Полиса за непредвидени околности

Датум на стапување на сила: 20 јануари 2021 г.

Преглед

Во оваа „Полиса за непредвидени околности“ е објаснето како се постапува со откажувањата кога ќе искрснат непредвидени настани што не се во ваша контрола по резервирањето и поради коишто не можете или законски не смеете да ја завршите резервацијата. Оваа полиса важи за резервации на сместувања и доживувања.

Кога е можно откажување според полисата, таа ги заменува правилата за откажување на резервацијата. Гостите кои се погодени од настан кој е покриен со полисата може да ја откажат резервацијата и, во зависност од околностите, да добијат враќање на парите во готовина, кредит за патување и/или друга наплата. Домаќините кои се погодени од настан кој е покриен со полисата може да откажат без негативни последици, но, во зависност од околностите, нивните календари може да бидат блокирани на датумите на откажаната резервација.

Кои настани се покриени

Поимот „Настан“ што се употребува во оваа полиса се однесува на следниве ситуации што се случуваат по резервирањето, не биле предвидени при резервирањето и го спречуваат или законски го забрануваат завршувањето на резервацијата.

Промени во барањата за патување одредени од владата. Неочекувани промени во барањата за виза или пасош наложени од владина агенција со коишто се спречува патување до дестинацијата. Овде не спаѓаат изгубените или истечени патни документи или други лични околности поврзани со овластувањето за патување на гостинот.

Прогласени вонредни состојби и епидемии. Локални или национални вонредни состојби, епидемии, пандемии и вонредни состојби поврзани со јавното здравје прогласени од владата. Овде не спаѓаат ендемичните болести или болестите поврзани со одреден регион, на пример маларијата во Тајланд или треската денга на Хаваи.

Ограничувања за патување одредени од владата. Ограничувања за патување наложени од владина агенција со кои се спречува или забранува патување до, престој во или враќање од локацијата на сместувањето. Овде не спаѓаат необврзувачки совети за патување и слични владини упатства.

Воени дејства и други непријателски активности. Војни, непријателски активности, инвазии, граѓанска војна, тероризам, експлозии, бомбардирања, побуни, немири, востанија, граѓанска непослушност и граѓански немири.

Природни непогоди. Природни непогоди, природни катастрофи, големи прекини на основни комунални услуги, вулкански ерупции, цунами и други тешки и несекојдневни настани поврзани со временските услови. Овде не спаѓаат временските или природните услови што се доволно чести за да бидат предвидливи на конкретната локација, на пример ураганите за време на сезоната на урагани во Флорида.

Што не е покриено

Сѐ останато. Оваа полиса дозволува откажувања само за настаните опишани погоре. Сѐ останато не е вклучено. Во некои од примерите на ситуации за кои не е овозможено откажување според полисата спаѓаат: неочекувано разболување, болест или повреда; обврски кон владата како поротничка должност, појавување на суд или должности поврзани со војска; совети или други упатства од владата поврзани со патување (што не се забрана за патување); откажување или презакажување на настан за којшто била направена резервацијата и прекини во превозот што не се поврзани со настан опфатен со полисата, како на пример затворање на патишта, како и откажување на лет, воз, автобус и траект. Ако откажете резервација во овие случаи, вратениот износ ќе биде утврден според правилата за откажување што важат за резервацијата.

Што да направите следно

Ако ве известиме или објавиме информации со кои се потврдува дека полисата важи за вашата резервација, следете ги упатствата за откажување што ќе ви ги дадеме. Кога ќе ве известиме или кога ќе објавиме информации во врска со тоа како се применува полисата, треба да имате опција да откажете според полисата така што ќе отидете на страницата „Патувања“ и ќе ја откажете засегнатата резервација. Ако сметате дека полисата важи за вашата резервација, но не сме ве известиле или не сме објавиле информации во врска со настанот, контактирајте нѐ за да ја откажете резервацијата. Во секој случај, треба да бидете подготвени да приложите документација којашто покажува како настанот влијаел на вас или на резервацијата.

Ако имате прашања, контактирајте нѐ.

Останати работи кои треба да ги знаете

Оваа полиса важи за сите резервации со датум на пристигнување кој се совпаѓа со датумот на нејзиното стапување на сила или по тој датум. Оваа полиса не важи за резервации од категоријата Luxe коишто подлежат на одделни „Правила за враќање на парите на гостите во категоријата Luxe“.