Како да ја осмислите приказната

Супердомаќините Тереза и Дејвид знаат како да го привлечат вниманието на гостите преку раскажување приказни. Како родители, конзерватори, креативни директори, автори со објавени дела и сопственици на кампот Вандавега во Елкхорн, Висконсин, тие научија како искусните приказни можат да ги зближат луѓето. „Кога започнавме да откриваме и да објавуваме детали за историјата на кампот – од нелегален бар од 1920-тите во кое се состанувала мафијата, преку бордел, до летен камп за латвиските бегалци, како и нашата сопствена поврзаност со него – откривме дека луѓето навистина ги интересираат такви информации“, вели Тереза.

Во оваа статија, тие споделуваат некои корисни совети за тоа како да ја пронајдете и создадете приказната за вашиот дом.

Тереза: „Дури и ако вашето сместување не е нелегален бар од пред еден век, секогаш има по некоја приказна за раскажување. За да ја најдете вашата, започнете да истражувате:

• Каква е историјата на вашиот дом?
• Кои работи се уникатни за вашиот град, а гостите не можат да ги искусат на ниту едно друго место?
• Кои се интересните ситници што ги земате здраво за готово?

Истражете малку и додајте ги информациите на огласот.“

Дејвид: „Има уште многу работи што може да ги споделите во огласот освен бројот на спални соби и бањи. Луѓето сакаат да знаат каде можат да испијат шолја совршено кафе, сакаат да ги знаат вашите омилени места. Затоа споделете што е уникатно за искуството што можете да го понудите. Гостите бараат начин и причина за емоционално поврзување, а приказните ни помагаат да се зближиме.“

Дејвид: „Многу рано научивме дека треба предвреме да ги поставиме очекувањата на луѓето бидејќи последното нешто што сакаме да го направиме е да ги разочараме. Затоа го создадовме нашиот „Манифест на ниски очекувања“. Тоа е забавен начин на кој го претставуваме селскиот живот во кампот. Во него пишува што да очекуваат луѓето, а често тоа се непријатни бубачки, шумски суштества и недостаток на клима уред, па ако ви требаат египетски чаршафи или модерни луксузи, ова можеби не е вистинското место за вас.“

Тереза: „Кај нас нема преправање. Го нагласуваме тоа со јазикот што го користиме за да го опишеме нашето сместување. Одлучивме да бидеме искрени со луѓето. Тонот што го користиме е забавен, но болно вистинит. Нашата смисла за хумор се крие во хиперболите коишто ги доведуваме до крајност, а верувам дека поради тоа луѓето мислат дека сме попристапни. И не мора да бидете текстописец за да бидете пристапни. Може само да го опишете вашето место на сосема скромен начин.“

Дејвид: „Кога разгледувам на Airbnb, ми се допаѓа кога нечиј карактер излегува на виделина според начинот на кој тоа лице го опишува своето место. Особено ако делиме простор, сакам да знам дека има смисла за хумор и дека е некој со кој би сакал да се дружам. Не трудете се да ме придобиете по секоја цена. Не преувеличувајте. Само бидете искрени, реални и забавни бидејќи луѓето сакаат да се чувствуваат пријатно кога ќе дојдат да престојуваат во вашето сместување.“

Тереза: „За да го зголемите интересот и бројот на резервации, потрудете се вашето сместување да биде присутно на социјалните мрежи. Всушност, повеќето луѓе прво нѐ наоѓаат на социјалните мрежи. Тие наидуваат на нашите слики или нѐ наоѓаат преку нашите објави на Instagram. Тоа е навистина одличен начин да привлечете луѓе и да им ги претставите искуствата што можат да ги доживеат на кампот. Неколку совети:

• Обидете се да ги споделите моментите од животот кои луѓето би сакале да ги искусат. Кој не би сакал книга до креветот и шолја врело кафе со убав поглед низ прозорецот?
• Доброто уредување и добрата фотографија се важен дел од визуелното раскажување приказни. Нека бидат привлечни и убави!“

Дејвид: „Не знам ни сам колку луѓе, кога пристигнуваат во кампот Вандавега, ми имаат речено дека виделе фотографија на Instagram и добиле моментална желба и сами да го доживеат прикажаното искуство. Instagram станува листа со моменти кои сакате да ги доживеете и визуелен преглед на вашето сместување за потенцијалните гости. Честопати тоа може да биде причината што добивате резервации.“

Дејвид: „На почетокот направивме многу грешки. Но научивме да го прифаќаме она што го нарекуваме „учење од грешките“ и дека животот е хаос. На пример, со раскажувањето приказни, дознавме дека постои „прекумерно споделување“. Колку и да им е интересно на луѓето да слушаат за сопственички на бордели, за мафија или за убиства, не мора да знаат каде точно сѐ се случувало, особено ако треба да преспијат таму. Со текот на времето, ќе откриете што функционира, а што не, како и што ги интересира вашите гости.“

Тереза: „За нас, учењето од грешките е прифаќањето на секој проблем како можност за напредок. Така се учи.“

Тереза: „Кога започнавме со ова патешествие за првпат, многу ми беше страв да ги споделам нашите фотографии на кои се гледа како изгледаше сместувањето претходно. Мислев дека никој нема да сака да престојува кај нас поради тоа што изгледаше ужасно. Но, всушност најголем придонес имавме од фотографиите „пред и потоа““.

Дејвид: „Луѓето добро реагираат на искреност. Сакаат да го видат процесот. Уште еднаш нагласувам, тие бараат да остварат лична поврзаност, па не плашете се да споделите делови од вашето лично патешествие. Бидете искрени и раскажете ја вашата уникатна приказна.“

Дознајте повеќе за тоа како да станете домаќин