Како местото да заблеска на социјалните мрежи?

Снаоѓањето низ социјалните мрежи може да направи да се чувствувате изгубено. Од каде да започнете? Како се создаваат одлични содржини? Како од нив да добиете повеќе резервации? Том Фелдман од Тај Хаус во Скајкомиш, Вашингтон, го споделува својот успешен, но пред сѐ човечки пристап за тоа како да создадете заедница на следбеници и како да го направите вашиот дом задолжително место за посета.

„Нашата приказна со угостувањето започна во 2012 година, кога ја купивме првата дрвена колиба во планински стил, Тај Хаус. Ја поправивме, ја огласивме на Airbnb и отворивме сметка на Instagram со фотографии од нашиот дом покрај живописни сцени од регионот на кои се претставени нашите прошетки во природа, локални атракции и она што ни се допаѓа во опкружувањето. Набргу потоа, популарниот фотограф Алекс Строл ни се јави и праша за соработка. Го угостувавме два месеца како еден вид креативен одмор во замена за фотографии што ги споделувавме на нашата страница. Кога почнавме да ги објавуваме фотографиите на Алекс, нашата популарност се зголеми. Ова беше прва од многуте соработки и натпревари што следуваа.

„Моето семејство и јас сега управуваме со три дрвени колиби во планински стил и продолжуваме да угостуваме влијателни лица од целиот свет. Како замена за споделувањето на нивната авторска содржина на нашата страница, им обезбедуваме место за истражување, авантура и релаксација. Ова стана една од нашите примарни маркетиншки техники. Преминавме од стапка на пополнетост од 30 % на близу 100 %, пополнувајќи ги работните денови, но и месеците кога сезонската побарувачка е ниска. Создадовме и онлајн заедница од речиси 115 илјади следбеници. Еве ги нашите совети за тоа како да го ставите вашиот дом на мапата на социјалните мрежи.“

„Првиот чекор кон рекламирањето на вашиот дом можеби изгледа мал, но е важен, а тоа е да го именувате вашиот простор. Треба да најдете име што е препознатливо и лесно за паметење. Потоа, може да го брендирате домот и да го регистрирате корисничкото име на Instagram.

„Еве неколку прашања што ќе ви помогнат да смислите име:

• Каков вид на сместување нудите? Дали се работи за планинска куќа или имот на плажа? Дали домот е во тудорски стил или се работи за поткровје?
• Дали има одредена тематика во домот? Дали вашиот ентериер следи одреден стил? Дали е со пиратска тематика? (Таква навистина постои!)
• Дали има поврзаност со местоположбата, населеното место или градот? Дали може тоа да се вклучи во името?
• Дали има историско значење? Совршеното име можеби чека да биде откриено од минатото.

„Истражете онлајн и откријте ги имињата што ги користат другите огласи, како и кои имиња се достапни на социјалните мрежи. Ние нашата прва дрвена колиба ја именувавме по една од соседните реки, реката Тај. Правописот на втората половина, Хаус, беше инспириран од блискиот град со баварска тематика, Левенворт. Заедно, тоа стана Тај Хаус (Tye Haus)“.

„Откако ќе го изберете името и ќе отворите профили на социјалните мрежи, редно е да започнете со прекрасни слики. Немојте, повторувам, немојте да започнете со куп лоши фотографии. Сликите на вашата страница се првото нешто што луѓето ќе го видат, а вашата намера е да ги инспирирате. Сликите се тие што ќе ви донесат гости. Вашите фотографии треба да бидат:

• Доследни: одржувајте усогласен изглед и естетика што создава копнеж.
• Висококвалитетни: објавувајте остри, живописни слики и видеа со висок квалитет и избегнувајте точкести или матни фотографии.
• Точни: содржината треба добро да го одразува вашиот имот.

„Обидете се да го доловите она што го издвојува вашиот дом. Внатрешноста, карактерот или локацијата? Најдете го она што навистина го прави вашиот имот интересен. Запомнете дека не само што го рекламирате вашиот простор, туку го споделувате и искуството што луѓето ќе го добијат ако го посетат: вашата локација, знаменитостите и активностите во регионот. Ако не умеете да фотографирате, размислете да ангажирате професионален фотограф на почеток.“

„Друг начин да генерирате убава содржина за вашата страница е да соработувате со влијателни лица (на пр., фотографи, блогери и видеографи) и да им нудите престои со попуст во замена за содржина. Ви препорачуваме да истражувате и да контактирате со локални фотографи, блогери, видеографи и креатори на содржини во вашата област.

„Оваа стратегија е една од главните причини за зголемување на посетеноста на нашата страница. Бидејќи влијателните лица ги споделуваат своите објави за вашето место, тоа создава можност нови корисници да ги видат и да го откријат вашиот дом.“

„Кога стапувате во контакт со влијателни лица за да побарате соработка, важно е:

• Бидете професионални. Подгответе се и имајте широки познавања. Поставете ги вистинските прашања што ќе ви помогнат да го унапредите партнерството.
• Бидете јасни. Навистина може да биде едноставно како: „Еј, ми се допаѓа тоа што го правиш. Само што почнав да угостувам на Airbnb. Сакам да ти понудам креативна размена: престој за авторски слики или напис?“
• Одредете ги очекувањата. Создајте заеднички договор за двете страни за да биде јасно што очекува секој од вас и што ќе добие. Тој треба да вклучува детали како што се датуми на испорака, права за сликите, означување, број на слики/видеа, видови на датотеки итн.
• Нека биде корисно и за двете страни. Гледајте на партнерството како на соработка и потрудете се да биде корисно и за двете страни.

Друг сличен совет е никогаш да не го оставате местото без гости. Ако ви се ослободат некои датуми во последен момент, искористете ја паузата за маркетиншки цели. Поканете локално влијателно лице да престојува кај вас за да може да го искористите времето за генерирање дополнителни содржини за вашата страница.

Откако ќе воспоставите онлајн присуство и ќе создадете страница полна со одлични слики, време е да се претставите. Ова може да се направи на многу различни начини:

• Бидете локален онлајн амбасадор во вашиот регион. Најдете ги онлајн круговите што ви се важни и бидете присутни во нив. За Тај Хаус сакаме да бидеме во тек со социјалните мрежи на локалните бизниси и околните ознаки за локација. На пример, следиме блиско скијачко одморалиште, па може да одговориме на прашања што другите луѓе ги оставаат или да коментираме и да кажеме: „Следниот пат кога ќе бидете во градот, дојдете да престојувате кај нас.“
• Соработувајте со брендови за да приредите натпревари и дарувања. Организираме и натпревари и промоции за да го зголемиме бројот на следбеници. Размислувајте пошироко за да најдете партнерства што одговараат на вашиот „бренд“. Соработуваме со фирма за ќебиња, постелнина и прибор за јадење за да ги здружиме нашите заедници. Стапивме во контакт и им рековме: „Еј, ќе викнеме некои влијателни лица да зборуваат за вашиот производ, дали би биле заинтересирани за соработка? Можам да ви понудам и бесплатно сместување.“ Ова се и одлични можности за започнување на база на податоци со адреси на е-пошта.
  

По правило, луѓето обично не сакаат себепромоција, без разлика дали е онлајн или лично, па важно е да сте автентични во сите ваши интеракции. Не коментирајте на објавите на сите влијателни лица со истата порака само за да бидете видени и не почнувајте да испраќате пораки на секоја сметка на која ќе наидете. Треба да бидете умерени бидејќи луѓето може да почувствуваат кога претерано се трудите да им продадете нешто. Бидете искрени во тоа што го зборувате и ќе ги привлечете вистинските луѓе.

Како лично правило, се обидувам да не претерувам со хаштазите. Означуваме неколку значајни страници на фотографијата и вклучуваме од 5 до 10 хаштази по објава. Некои луѓе користат цел куп слики и хаштази за да бидат откриени, но јас претпочитам посуптилен и поприроден пристап.

Запомнете дека за да создадете заедница на следбеници е потребно време и тоа секако не се случува преку ноќ. Ве охрабрувам да ги искористите овие совети, да бидете креативни и тоа секако ќе придонесе за зголемување на вашата заедница на социјалните мрежи, а тоа ќе се одрази позитивно и на стапката на пополнетост.

Уживајте во угостувањето!
Том