Заедница за споделување: програмата за бегалци од Авганистан на Airbnb.org

Инспирирана од вашата великодушност, организацијата Airbnb.org се обврзува да обезбеди привремено сместување за 20 000 авганистански бегалци како одговор на кризата во Авганистан. Цел труд е финансиран од Airbnb, Брајан Чески и други донатори, вклучувајќи ги и домаќините на Airbnb.

Многумина од вас, исто така, ги отворија своите домови за бегалци бесплатно или со попуст, пречекувајќи ги бегалците додека се преселуваат на нови места низ целиот свет. Неодамна разговаравме со домаќин и гостин на Airbnb.org за нивните искуства и што значи програмата за нив.

(Некои имиња се променети за да се заштити нивната приватност.)

Шахин неодамна го напушти Авганистан и започнува нов живот во Соединетите Американски Држави. Заминувањето од дома, како и напуштањето на неговата сопруга и трите деца, беше тешко патешествие, но тој вели дека наоѓа утеха во излегувањето надвор, медитирањето и креативноста. Се шета во парк во близина на својот нов дом, седи на пристаништето и фотографира планини, дрвја и цвеќиња. Потоа, ги користи фотографиите како пример за неговите уметнички слики.

„Се опуштам од напорниот ден со тоа што сликам и правам калиграфија“, вели Шахин. Овие практики го држат приземјен и поврзан со неговиот дом во Авганистан, додека се справува со одвојувањето од неговото семејство.

„Физички сум тука, но ментално сум таму“, вели тој. Шахин споделува дека бегалското искуство вклучува тагување по минатото, прилагодување на непознатата сегашност и чувство на несигурност за иднината.

„Оваа приказна не е само моја, туку и на илјадници други“, вели тој. „Ова е тешка пресвртница во животот. Не знаете како да пазарувате, не знаете како да пишувате. Сѐ е различно.“

По неговото пристигнување во Соединетите Американски Држави, Шахин бараше стабилност и заедница. Преку лутеранските социјални служби, тој доби пари, намирници и бесплатно сместување преку Airbnb.org за да има полесен почеток.

Неговиот престој ги прошири ставовите на Шахин за домот и заедницата на начин на кој не го очекуваше.

Шахин вели дека го цени и неговиот однос со домаќинот. Ова е прв пат Шахин да престојува во некој стан, па затоа неговиот домаќин му покажал како да користи сеф за клучеви и да влезе во зградата. Планираат да ручаат заедно пред Шахин да продолжи на следната дестинација.

Шахин сѐ уште пробува да најде некоја стабилност помеѓу неговиот нов живот во Америка и животот што го остави во Авганистан. Додека Шахин копнее повторно да се најде со своето семејство, тој наоѓа надеж во моќта на изговорениот збор. „Само сакам да го споделам гласот на моето срце“, вели тој. „Сакам мир за себе и за мојот народ. Сакам да им дадам надеж на моите деца одовде. Сакам да ја спознаат слободата.“

Мелиса стана домаќин на Airbnb во март 2021 година. Преку Airbnb.org, таа бесплатно го понуди своето сместување за семејство погодено од ураганот Ајда, а сега им го нуди на луѓе кои бараат засолниште во други кризни ситуации.

Кога слушнала за илјадниците бегалци кои пребегуваат од Авганистан, Мелиса едвај чекала да помогне. Кога локалната организација YMCA, партнер на Airbnb.org, објави дека бараат некој кој може да смести седумчлено семејство, таа одговори.

Мелиса знаеше дека нејзиното место е доволно пространо за да може удобно да ги смести. Креативните и природни детали во нејзиниот дом ѝ овозможија да се поврзе со своите гости и да им понуди поддршка.

„Откако ќерка ми замина на факултет, мојот дом беше како празно гнездо“, вели Мелиса. „Искрено, угостувањето навистина ми помогна со осаменоста. Убаво е кога гледам деца како си играат во дворот, семејства кои готват и си играат со моите друштвени игри.“

Децата беа посебно љубопитни и возбудени за хранилката за птици. „Имам книга наречена „Дворски птици во Тексас“ и двоглед. Им ги покажав на децата и на мајката различните птици што можете да ги видите тука“, вели Мелиса. Таа се поврзуваше со нив со помош на птиците кардинали и сините врани (cyanocitta cristata) што ги забележаа заедно за време на нивниот престој.

Мелиса ѝ оддаде признание на нејзината заедница за големата поддршка за семејството да се чувствува уште подобредојдено во нивниот привремен дом.

„YMCA се појави со фрижидер полн со намирници.“ Вели Мелиса. „Сѐ што семејството би можело да посака да зготви, вклучувајќи и халал зачини. Тие, исто така, донесоа три пластични корпи полни со бебешки работи, средства за лична хигиена и училишни материјали.“

Дарио Липовак, виш програмски директор на YMCA во Хјустон, вели дека од сите донации што ги добива неговата организација, најпрактично е сместувањето. „Тоа кажува толку многу за луѓето кои сакаат да примаат странци во нивниот дом, како и за заедницата на домаќини која нуди поддршка. Кога некој ќе рече: „Што можеме да направиме за да помогнеме?“, тоа дава чувство на обединување.“

Дознајте како може да им помогнете на бегалците преку Airbnb.org