Чистете како професионалец со овие совети од експерти

Темелното чистење помеѓу гостите е значаен дел од угостувањето со пет ѕвезди. Една од најчестите причини поради кои гостите им даваат помалку од пет ѕвезди на домаќините е недоволна чистота.

Не дозволувајте прашината, дамките или мирисите да го оцрнат вашето одлично гостопримство. Пробајте ги овие совети од професионалната чистачка Дајана Круз. Таа и нејзиниот сопруг чистат десетина имоти за домаќини со сместувања на Airbnb во југозападна Флорида.

Олеснете си ги задачите за чистење така што ќе се подготвите за успех. Дајана се потпира на разновидни предмети како следните:

• Џогер за повеќекратна употреба со микрофибер и глава со четка за триење подови и бришење прашина од тешко достапните агли.
• Двострана кофа за џогер за одвојување на водата со сапун од водата за плакнење.
• Правосмукалка со додатоци за теписи и пукнатини, како шините на лизгачките врати.
• Црево кое се прикачува за плакнење на мијалник, када или туш без црево.
• Повеќенаменска стругалка за стакло за површини за готвење и врати за туширање или паравани.
• Нетоксични раствори за чистење за отстранување дамки, нечистотии од сапун и кујнски маснотии.
• Сунѓери кои не гребат за отстранување дамки од тврда вода на елементи од челик што не 'рѓосува.
• Топчиња за во машина за сушење алишта за помалку конци и коса што се лепат на алиштата.
• Валјак за повеќекратна употреба за отстранување крзно и влакна од миленичиња од мебел прекриен со ткаенина.

Организираноста може да ви помогне максимално да го искористите вашето време. Складирајте ги сите средства за чистење на едно место, во преносна количка или во плакар на сопственикот кој се заклучува, и редовно дополнувајте ги залихите.

Важно е да направите многу повеќе од основните работи ако сакате да добиете пет ѕвезди од гостите, вели Дајана. Таа препорачува да имате рутина и листа на барања, за да не заборавите ништо.

Дајана секогаш започнува со отстранување на целата постелнина од креветите. „Подобро е да имате резервни комплети на чисти чаршафи и крпи за ако имате промена на гостите во текот на истиот ден“, вели таа. „На големите, меки крпи им треба цела вечност да се исушат и тоа ве успорува.“

Таа води дополнителна грижа за отстранување на нечистотиите, дамките и влакната на најчесто занемарените места, како што се:

• Под креветите. Погледнете под секој од нив и исчистете ја прашината или предметите што се оставени.
• Внатре во фиоките. Отворете ги сите и отстранете ги остатоците што се внатре.
• Вратите од шкафовите. Избришете ја предната страна и рабовите.
• Апаратите за домаќинство. Исчистете ги сите траги од трошки, остатоци или истекувања од тостерот, машината за кафе, микробрановата печка и фрижидерот.
• Внатрешниот декор. Избришете ја прашината од сите површини, вклучувајќи ги полиците, ролетните на прозорците и куќните растенија.
• Надворешните простори. Изметете ги влезовите и поплочените дворови и отстранете ги нечистотијата, листовите и пајажините.

Кога ќе завршите, проверете што сте направиле. Ова вклучува проверка на алиштата и садовите додека ги вадите од машината за сушење алишта или од машината за садови.

Закажете подлабинско чистење на секои два или три месеца за работите за кои немате време во услови на честа промена на гостите.

Секој има различно сетило за мирис. Силните мириси од секаков вид може да им бидат непријатни на гостите. Обидот да се маскираат мирисите со белило, освежувачи на воздух или други решенија обично не функционира, вели Дајана.

Дајана предлага: 

• Отворете ги прозорците додека работите секогаш кога временските услови го дозволуваат тоа.
• Оставете го прочистувачот на воздух да работи два или три часа за да помогне да се неутрализираат посилните мириси.
• Испрскајте со благо, повеќенаменско средство за дезинфекција што сте го разредиле со вода во ткаенината на каучите, завесите и теписите.

„Се обидувам претежно да користам средства за чистење од растителна основа, ништо премногу силно“, вели Дајана. „Тие се поскапи, но се добра инвестиција. Добив толку многу комплименти за свежиот мирис на местото.“

Дополнителните детали може да имаат значајно влијание врз гостите. Дајана препорачува да направите три последни работи за да оставите одличен прв впечаток.

• Дополнување на удобностите. Овде спаѓаат средство за миење садови, сапун за раце, гел за туширање, шампон и балсам. Ако нудите нешто што е за еднократна употреба, како сунѓер за садови, оставете нова замена во обвивката.
• Средете ги додатоците во домот. Далечинските управувачи и украсните перници нека бидат уредно наместени, а предметите како фенот, тенџерињата и тавите – складирани во фиоки и шкафови.
• Додајте малку шарм со декоративно „диплење“. Подвиткајте ги рабовите на тоалетната хартија и хартиените крпи за да имаат остар агол, како што може да се очекува во некој луксузен хотел.

„Дури и убаво ги преклопувам вреќите за ѓубре“, вели Дајана. „Гостите ги забележуваат малите детали. Тоа е доказ дека всушност некој човек го прави сето ова.“

Размислете да додадете кодомаќин или лице за чистење кои ќе ви помогнат да ги исполните вашите цели за чистење. Дополнителната поддршка може да ја направи промената на гостите поефикасна и да ви помогне да обезбедите искуство за гостите со пет ѕвездички.

Дајана Круз и нејзиниот сопруг не се на сликата.

Информациите што ги содржи статијава може да се променети по објавувањето.