Соочување со кризата во Украина со непосредна помош

Во текот на неделата по руската инвазија на Украина, изведувачот и домаќин Рафал веќе го почувствувал нејзиното влијание во неговиот роден град Вроцлав во југозападна Полска. Кутии со донирани намирници се натрупувале пред украинскиот културен центар во неговото соседство. Слушал како се зборува украински јазик на улиците и во продавниците.

Набрзо, три семејства од Украина резервирале едномесечни престои еден по друг, во куќата што ја има огласено на Airbnb. Загрижен поради фактот дека треба да им наплати на луѓе што бегаат од војна, Рафал контактирал со корисничката служба на Airbnb и дознал дека Airbnb.org може да го субвенционира неговиот труд, па се регистрирал.

Според Советот за човекови права на ОН, речиси 7 милиони луѓе побегнале од Украина во шесте месеца по инвазијата во февруари 2022 година. Милиони семејства пристигнаа во градовите низ цела Европа со само неколку куфери и без поим кога би можеле да се вратат дома.

Како одговор на кризата, Airbnb.org упати повик до своите непрофитни партнери и до глобалната заедница на домаќини: „Може ли да ни помогнете да понудиме привремено сместување за до 100 000 лица кои бегаат од Украина?“

Оттогаш, Airbnb.org ја исполни таа цел благодарение на глобалниот наплив на поддршка од домаќините, донаторите на Airbnb.org и хуманитарните организации кои им помагаат на луѓето на терен.

Некои луѓе кои одговориле на повикот, како Рафал, се долгогодишни домаќини на Airbnb кои нудат сместувања со попуст преку Airbnb.org во ова кризно време. Други, како Мери, која е американски научник за податоци и живее во Берлин, беа меѓу 40 000 нови домаќини кои се одлучија да им понудат бесплатни сместувања или сместувања со попуст преку Airbnb.org на гостите бегалци.

Рафал вели дека инвазијата на Украина ги шокирала сите што ги познавал во Полска, но сепак бил вчудовиден од тоа колку брзо неговите пријатели и соседи реагирале на напливот на луѓе кои бегале од војната. Луѓето донирале храна на железничката станица во Вроцлав и собрале намирници што биле испорачани до границата со Украина.

Тој почнал да организира хуманитарен музички настан со своите колеги, но сакал и да најде начин на кој ќе може непосредно да помогне. „Една од најлошите работи е да немаш каде да престојуваш, каде да спиеш, каде да се вратиш“, вели тој.

Рафал и понатаму ја огласува својата куќа преку Airbnb.org за да угостува лица раселени поради кризи. Исто така, помагаше во толкувањето при вебинари на Airbnb.org на полски јазик.

Во Берлин, околу 215 милји (350 километри) северозападно од Вроцлав, Мери ги следела вестите за инвазијата на Украина. Кога го видела повикот за дејство на Airbnb.org на интернет, бесплатно го огласила својот стан.

Член на персоналот на Организацијата за бегалци, азил и миграција (ORAM), еден од партнерите на Airbnb.org, ја исконтактирал. Според објавите на многу медиуми, расположението против ЛГБТК+ заедницата во Украина и околните земји ги ставило ЛГБТК+ луѓето кои се раселиле поради конфликтот во уште поранлива положба. Претставникот на ORAM ја прашал Мери дали две трансродови лица можат да престојуваат кај неа.

Мери била среќна што може да угости лица од ЛГБТК+ заедницата. „Знаев дека мојот стан е особено безбеден простор за нив“, вели таа.

Набрзо по заминувањето на првите гости на Мери, Дима пристигнал за престој од две недели. Геј маж во своите 20-ти години, Дима живеел во Киев кога Русите почнаа да го бомбардираат градот. Локалната организација Safebow им помогнала на Дима и неговата мачка, Пич, да отпатуваат преку Полска до Берлин. Организацијата за бегалци, азил и миграција ORAM таму им помогнала да најдат сместување и да се пријават за социјални услуги.

По патувањето исполнето со пречки, пристигнувањето во станот на Мери било олеснување за Дима. „Бев многу чувствителен во тие први денови“, вели тој. „Не знам ни што ми беше поважно: да бидам во безбеден простор или само да сфатам колкава поддршка добивам“.

Мери не била во градот во текот на првата недела од престојот на Дима. Кога се вратила во Берлин, веднаш си се допаднале. Со часови седеле на нејзината кујнска маса, делејќи оброци и пиејќи пиво. Останале во контакт и откако тој се преселил во друг стан.

„Ми беше огромна помош за мојот почеток овде“, вели Дима.

Мери постојано размислува за тоа колку било лесно да се угостува. „Не направив ништо особено исклучително“, додава таа. „Едноставно пробав. Можеби имаше само некои мали непријатности.“

Го споредува ова со приказните што ги споделиле нејзините гости: „Размислувам како е кога човек треба да се справи со [разни нешта] во сосема ново место, каде што не дошол по сопствен избор, и тоа далеку од семејството. Тоа е исклучително. Тешко е.“

Мери не очекувала да се спријатели со гостите, но мисли дека чувството на заедница кое се разви со угостувањето е прекрасно.

„Често вложуваме многу напор во нештата, па не гледаме каков исход имаат“, вели таа. „Со ова, знаев дека ќе направам разлика во животот на барем едно лице.“