7 совети за угостување лица кои избегале од некоја кризна ситуација

Ако претходно сте угостувале преку Airbnb, веројатно сте поминале многу часови размислувајќи за тоа што да направите за гостите да се чувствуваат добредојдени во вашето сместување.

Кога угостувате во сместувања за итни случаи преку Airbnb.org, може размислувате и како да пречекате гости кои можеби доживуваат одредена траума.

Луѓето кои ги напуштиле своите домови во потрага по безбедност, а понекогаш и со кратко време за да се подготват, може да имаат различни грижи и очекувања од луѓето кои патуваат за задоволство. Тоа е една од причините зошто Airbnb.org соработува со непрофитни организации специјализирани за поддршка на луѓе кои бегаат од конфликти и природни непогоди. Овие организации понекогаш обезбедуваат услуги посветени на менталното здравје на гостите за време на нивниот престој.

Airbnb.org нуди специјално обучена поддршка за корисници за вас и вашите гости ако се појават сложени проблеми. Исто така, ги поддржува гостите без оглед на националноста, потеклото, етничката припадност или начинот на кој се идентификуваат.

Удобниот, безбедниот и приватниот простор за семејство кое поминало низ трауматично искуство е бесценет. Многумина немале пристап до кујна каде што можат да готват или дневна соба каде што можеле да се соберат откако ги напуштиле своите домови.

Еве неколку чекори што може да ги преземете за вашиот простор да биде попријатен:

• Поттикнете го чувството на топлина и удобност во просторот за да им помогнете на луѓето да се опуштат. Чистите постелнини и крпи, основните средства за лична хигиена и основните удобности во кујната може да им помогнат на луѓето да се чувствуваат како дома, дури и ако престојуваат само неколку дена.

• Некои гости можеби се загрижени за нивната лична безбедност. Потрудете се патеките и влезовите да бидат добро осветлени. Проверете дали сите брави, ролетни и завеси работат. Известете ги ако треба да очекуваат силна бучава, на пример, од авиони кои летаат директно над нив или од камиони кои собираат ѓубре во близина на куќата во раните утрински часови.

• Луѓето кои се соочуваат со траума и транзиција може да имаат тешкотии со помнењето на информациите. „Не можете да размислувате разумно, не можете да ги обработувате информациите“, вели еден гостин кој бил евакуиран за време на голем пожар во Калифорнија. „Тоа чувство преовладува до тој степен што едноставно не знаете како да ги вршите работите и тоа речиси ве блокира“. Визуелните помагала може да им помогнат на вашите гости. Може да понудите испечатен лист со адресата на сместувањето и мапа на соседството кој гостите може да го користат кога ќе им треба.

• Ако вие и вашите гости зборувате на различен јазик, побарајте локални непрофитни организации или фирми кои може да понудат материјали преведени на јазик што го знае гостинот. Ако некој социјален работник од непрофитните организации кои се партнери на Airbnb.org работи со вашите гости, можеби ќе може да помогне и околу ова.

За многу домаќини, остварувањето лични врски со гостите е една од најголемите награди од угостувањето. Еве неколку работи што треба да ги запомните кога комуницирате со гости кои можеби неодамна доживеале траума.

• Транспарентноста и доследноста се многу важни. Известете ги гостите однапред ако некој треба дојде да врши работи за одржување во или околу куќата и ако треба да наминете.

• Кога разговарате со гостите, обидете се да се фокусирате на прашања во врска со нивниот престој, наместо на ситуацијата што ја преживеале. Мери којашто угостуваше неколку луѓе кои бегаа од Украина, вели: „Поставував општи прашања како „Од каде доаѓате?“ и „Како патувавте?“.“ Вашите гости ќе ве известат ако сакаат да зборуваат повеќе за своето искуство, додаде таа. Почитувајќи ја нивната приватност, им давате простор да соберат сили и да се опорават.

• Земете го предвид мислењето на гостите за тоа каква интеракција би сакале да имаат со вас. Некои можеби сакаат да останат блиску до нивните семејства. Други може да ве контактираат и да ве замолат да им помогнете да изградат врски во заедницата.

Ви благодариме што сте подготвени да ги понудите своите простор, време и љубезност. Ако сакате повеќе информации за тоа како да се подготвите за престои за итни случаи, ќе најдете статии и видеа во водичот за угостување преку Airbnb.org во „Центарот за информации“.