Совети за угостување лица со потреби за непречено движење низ домот

Многу гости на Airbnb имаат посебни потреби за пристапност. Луѓето со ограничена подвижност понекогаш користат одалки со ракофат или инвалидски колички и сакаат да знаат на кој начин вашето сместување може да ги исполни нивните потреби пред да ја направат резервацијата.

Бидејќи гостите често користат филтри при пребарувањето за карактеристики за пристапност за лица со попреченост, ако истакнете што нуди вашиот простор, огласот може да се појави во повеќе резултати од пребарувањата и да ви ги зголеми шансите да добиете резервација.

Airbnb сега ја има категоријата „Приспособени“ која ги истакнува сместувањата за кои е потврдено дека се соодветни за корисниците на инвалидски колички, со патеки без скали до влезовите и најмалку една спална соба и бања. Не заборавајте да ги додадете на огласот сите карактеристики за пристапност за лица со попреченост што ги имате, а ако вашето сместување ги исполнува условите, може да биде прикажано во оваа нова категорија.

Софи Морган, телевизиска водителка и застапник на правата на лицата со попреченост прикажана во видеото погоре, стана домаќин на Airbnb бидејќи сакаше да го отвори својот посебно дизајниран дом за други патници. „Многу се трудев за да го направам мојот дом пристапен“, вели таа. „Знам дека одлично би одговарал и за многу други луѓе, особено за оние со попреченост, затоа навистина сакам да го споделам.“

Софи признава дека на лицата кои имаат потреби за непречено движење може да им биде тешко да патуваат, но се обидува да не дозволи тоа да ја спречи да го обиколи светот. „Веќе 19 години користам инвалидска количка“, вели таа. „Светот не е дизајниран за луѓе со попреченост, но патувањето без сомнение вреди за трудот.“

Еве некои упатства за создавање пријатен простор за гостите со потреби за непречено движење да можат да резервираат со доверба.

Карактеристиките кои може да ви помогнат вашето место да се истакне кај гостите вклучуваат:

• место за паркирање за лица со попреченост
• осветлување на патеките до влезот
• патека без скалила до влезот за гости
• влез за гости без скалила
• влез во собите без скалила
• влезови пошироки од 81,28 сантиметри/32 инчи
• туш без скалила
• држачи за во тоалет и/или во туш
• столче за во туш или када
• дигалки на таван или подвижни дигалки
• дигалка за во базен

Дознајте повеќе за тоа како да додадете карактеристики за пристапност за лица со попреченост на огласот

Во видеото погоре, Софи предлага да додадете „колку што можете повеќе фотографии“ за да им помогнете на потенцијалните гости со потреби за непречено движење да разберат дали вашиот дом им одговара.

За да бидеме сигурни дека огласите се подготвени за гости со посебни потреби, им препорачуваме на домаќините да додадат кратки објаснувања на своите фотографии. На пример, може да направите фотографија од бања со фиксирани држачи и да ги известите гостите дека тоа е единствената пристапна бања во куќата.

Фотографирајте од повеќе агли за да им помогнете на гостите да одлучат дали вашиот простор ќе ги задоволи нивните потреби. На пример, додајте фотографии од пристапно место за паркирање за јасно да ја покажете неговата локација во однос на вашата куќа.

Сите карактеристики за пристапност за лица со попреченост се прегледуваат според упатствата за фотографии на Airbnb пред да бидат додадени на огласот. Ако на фотографијата не се гледа јасно карактеристиката, може да ве замолиме да поставите нова фотографија или да ја отстраните карактеристиката од огласот.

Дознајте повеќе за тоа како да ги фотографирате карактеристиките за пристапност за лица со попреченост

Ако гостинот ве контактира во врска со потреби за непречено движење, тоа што ќе поставите неколку прашања пред да резервира може да им помогне на гостите да разберат дали вашето сместување им одговара.

Еве неколку примери за тоа како да започнете разговор:

• Имате ли некои конкретни прашања во врска со сместувањето?
• Дали можам да направам нешто за престојот да ви биде поудобен?

Пред да пристигне некој гостин со потреби за непречено движење, размислете дали има нешто што би го олеснило движењето низ просторот. Еве неколку идеи:

• да преместите некои столови и маси за да создадете поширока патека во просторот за дневен престој
• да овозможите полесен пристап до приклучниците за електрична енергија
• да поставите некои предмети како што се крпите и садовите на лесно достапни места

Дознајте како да го направите своето сместување попристапно

Со водичот, имате можност да им дадете совети на гостите за регионот кои ќе ги истакнат вашето гостопримство и градот. Кога додавате препораки за јадење, разгледување знаменитости и активности на отворено, обидете се да размислувате како патник со потреби за непречено движење.

На пример, размислете кои ресторани имаат пристапни патеки, наведете патеки за пешачење кои се поплочени и споделете информации за јавниот превоз. Ако ги вклучите овие совети во својата рутина за угостување, може да го направите вашето сместување привлечно за пошироката публика.