Водич за фотографирање на карактеристиките за пристапност за лица со попреченост

Гостите со потреби за непречено движење низ домот сакаат да знаат што да очекуваат кога ќе пристигнат во вашето сместување. Поставувањето квалитетни фотографии во делот „Пристапност“ на огласот, почнувајќи од снимки од влезот, па сѐ до слики од внатрешниот простор, може да им помогне на гостите да одредат дали може безбедно и удобно да се движат низ имотот.

Како домаќин, ваша одговорност е да се погрижите описот и фотографиите од сместувањето да бидат ажурирани и точни. И иако не е ваша одговорност да ги разберете потребите на секој гостин, јасното фотографирање на просторот им овозможува на потенцијалните гости да одлучат дали вашето сместување им одговара.

Airbnb ги разгледува сите карактеристики за пристапност за лица со попреченост пред да бидат додадени на вашиот оглас. Ако карактеристиката не е покажана јасно на сликата како што се бара со нашите упатства, може да ве замолиме да поставите нова фотографија или да ја отстраните карактеристиката од огласот.

Бидејќи размислувате да го ажурирате огласот, еве што треба да имате предвид:

• Може да наведете дека само во одредени соби има карактеристики за пристапност за лица со попреченост. На пример, може да наведете дека само во една бања има влез без скали.
• Не мора да обезбедите професионални фотографии. Може едноставно да направите фотографии со телефон. Овие фотографии се појавуваат во делот „Пристапност“ на страницата со огласот, кој е одвоен од галеријата со слики од сместувањето. Мора да вклучите најмалку една фотографија од секоја карактеристика за пристапност за лица со попреченост што ќе ја изберете.
• Користете метро за да им покажете на гостите дека имате широки врати (ова е дел од нашите критериуми за фотографии), кои се погодни за минување со инвалидска количка или со друго помагало за полесно движење.
• Поставувањето повеќе фотографии од различни агли и перспективи на секоја карактеристика им помага на гостите да си створат подобра претстава за вашиот простор. На пример, ако покажувате врата без скали, направете фотографии од двете страни на прагот за гостинот да може да го види целиот простор за влез во местото.

Може ли гостите да стигнат до вашата влезна врата од тротоарот или од најблискиот простор за паркирање без да наидат на скалила или скали? Со какви површини треба да се справат за да стигнат дотаму? Не заборавајте да направите јасни фотографии од патеката што однадвор води до влезот на сместувањето.

Како да го фотографирате влезот:
1. Застанете на оддалеченост од најмалку 6 метра од влезот на зградата на тротоарот или на најблискиот простор за паркирање за да покажете што е можно поголем дел од патеката и малку навалете ја камерата кон земјата за да ја покажете површината на патеката. Ако сместувањето се наоѓа во станбена зграда или хотел, не заборавајте да ја вклучите патеката од влезот на зградата преку лобито до влезот на вашата станбена единица. Доколку има лифтови или пристапни патеки, важно е да обезбедите фотографии и од нив.

2. Погрижете се да го покажете влезот во зградата на крајот од патеката.

Покажете им на гостите дека може да поминат низ влезната врата и да влезат во спалната соба, бањата, тушот и заедничките простори без да треба да се справуваат со скали, скалила, рабови или високи прагови (повисоки од 5 сантиметра).

Како да ги фотографирате влезовите:
1. Отворете ја вратата на влезот што сакате да го покажете и малку навалете ја камерата кон подот за да може јасно да ја фотографирате рамната патека од двете страни на прагот.

2. Оддалечете се најмалку 1,5 метра од влезот за да ги покажете двете страни на вратата. Ако просторот има повеќе влеза, не заборавајте да го фотографирате секој од нив.

3. Ако наведете дека одредена соба (спална соба, бања, дневна соба итн.) има пристап без скалила, потврдувате дека собата се наоѓа на приземје или дека до неа се пристапува со лифт или пристапна патека. Вклучете повеќе фотографии што ја покажуваат патеката од влезната врата до таа соба.

4. Ако имате туш без скалила, тргнете ја завесата или отворете ги вратите од тушот и малку навалете ја камерата кон подот на влезот за да покажете дека нема скалила или рабови поголеми од околу 2,5 сантиметри.

Совет: во нашиот прирачник за фотографии ќе најдете повеќе начини за правење одлични фотографии со вашиот смартфон.

Гостите со помагала за движење, како што се инвалидски колички, полесно ќе проценат дали ќе можат да се движат низ вашето сместување доколку ја знаат ширината на вратите. Според стандардите на Airbnb, за „широк влез“ се смета оној што има најмалку 81 сантиметар.

Отворете ја вратата и користете лента за мерење за да ја покажете ширината на рамката на вратата. Добро би било да направите две фотографии: една која ја покажува целата лента за мерење и друга со поголем зум за да може гостинот да го прочита измереното.

Има и многу други карактеристики кои можат да им помогнат на гостите лесно да влезат и удобно да се движат низ сместувањето. Ако имате нешто од наведеното, не заборавајте да го фотографирате и да го додадете на огласот за гостите да знаат што да очекуваат.

1. Покажете што е можно повеќе детали од секоја карактеристика на вашите фотографии.

2. Обидете се да опфатите и поголем дел од околните елементи, за гостинот да има претстава каде се наоѓа карактеристиката или колку е голема. На пример, ако фотографирате стол за туширање, не заборавајте да го поставите во тушот.

Стол за во туш/када: ова обично е клупа или самостојно столче наменето за лицата со ограничена подвижност да можат полесно да се бањаат. Ова може да биде и седиште вградено во ѕидот, но не може да биде мебел кој не е наменет за бањање (како мебел за во двор или пластични столчиња на преклопување што може да се лизнат на влажна површина).

Дигалка прикачена на таван или подвижна дигалка: ова е дигалка прикачена за таванот или самостоен уред кој им помага на луѓето да станат и да седнат во инвалидска количка.

Пристапно место за паркирање: ова е јавно место за паркирање наменето за лица со попреченост или приватно место за паркирање на имотот на вашето сместување на кое има простор од најмалку 3,5 метра (11 стапки) за еден автомобил. На фотографијата покажете го јавното место за паркирање со соодветната ознака или приватниот простор за паркирање со паркиран автомобил до местото за паркирање за гости за да може добро да си го претстават. Исто така, може да вклучите метро на фотографијата за да ја покажете ширината.

Добро осветлена патека до влезот: ова е надворешната маршрута од патеката за автомобили или надворешната патека до влезот на сместувањето што е осветлена со улични светилки, украсни светилки или други извори на вештачко светло. Обидете се да ја фотографирате патеката навечер или рано наутро за гостите да ја видат положбата на светилките и колку е светло.

Размислете на кои други начини можете да им помогнете на гостите со потреби за непречено движење низ домот. Јасната комуникација и воведувањето неколку промени во сместувањето и на огласот може да направи голема разлика за многу гости.

Џејк, гостин со ограничена подвижност, убаво го резимира ова: „Обезбедувањето точни информации однапред им овозможува на лицата со попреченост навистина да бидат истражувачи.“

*Според податоците на Airbnb собрани од јануари до мај 2019 г.