Тајни од искусен Супердомаќин

Ники беше еден од првите домаќини на Airbnb што добија статус на Супердомаќин кога програмата за првпат започна во 2014 година. Таа го задржа тој статус повеќе од 16 последователни тримесечја.

Како Ники успева да го прави тоа? Сите тајни на угостувањето ги научила постепено, почнувајќи со мала викендичка во нејзиниот двор во Сан Франциско. Бидејќи издавањето на ова сместување одело толку добро, таа одлучила да ја издава целата своја куќа со три спални соби за време на нејзиниот одмор со семејството.

Тука, Ники ги споделува тајните на нејзиниот успех како Супердомаќин.

„Пред шест години престојував во моето прво сместување на Airbnb во Прованс, Франција и ми се допадна. Беше едно мало студио во стариот дел од градот Екс. Ги задоволи нашите потреби, но домаќините не вложиле многу напор да го направат шармантно или слично. Сфатив дека ако вложам малку пари, можам да направам нешто многу посебно со малата гостинска куќа од 18 квадратни метри во мојот двор. Мислев дека ретко ќе добивам резервации, но бев изненадена кога веднаш беше резервирано за цела недела.“

„Секогаш кога објавувам нов оглас онлајн, започнувам со почетна цена за сместувањето која е само 50 – 70% од пазарната цена, сѐ додека не добијам најмалку три рецензии (или додека не добијам толку многу барања за резервација што ќе можам да ја зголемам цената во согласност со моменталната пазарна цена). Го правам ова за да можам да ги решам ситните проблемите без да жртвувам добри рецензии и бидејќи е важно да добиете што повеќе рецензии што е можно поскоро за огласот да се појавува повисоко во резултатите од пребарувањето.“

„Сѐ започнува со добро место. Мора да биде чисто. Ми се допаѓа кога сместувањето е отворено и просторно. Да не е пренатрупано, но со неколку убави детали кои ќе им го привлечат вниманието на гостите и ќе ги опуштат. Исто така, мора да биде удобно, особено креветите. Не штедам и купувам душеци со мемориска пена, а луѓето ги обожаваат. Уредувањето на сместувањето е на некој начин изразување на емпатија. Прошетајте низ сместувањето и размислете за тоа како луѓето ќе го користат, а потоа вклопете го вашиот концепт за уредување околу тоа.“

„Добрите фотографии се многу важни и пресудни. Професионалните фотографии се задолжителни. Размислувам за тоа каков е просторот, без разлика на тоа дали станува збор за семеен простор или пак е идеален за одреден вид патници и го ставам тоа во насловот. Напишете навистина добар опис кој е многу детален и примамлив за да привлечете некого во сместувањето. Опишете ги креветите, постелнината, имињата на марките на одредени видови сапун или удобностите што ги нудите.“

„Во описот на сместувањето споменете го и она што е необично. Објаснете го тоа на начин на кој описот ќе биде искрен и јасен, без притоа да биде одбивен за гостите. Целта е да ги пружите сите потребни информации за гостите да можат да го изберат имотот што го сакаат.“

„За мене, комуникацијата е правило број 1 за добро угостување. Вашата директна комуникација со гостинот започнува со првото прашање. По секое барање за резервација, секогаш им поставувам неколку дополнителни прашања на потенцијалните гости, не за да бидам непристојна или љубопитна, туку само за да се осигурам дека сместувањето им одговара. Всушност, во тој момент го започнувате процесот на добивање рецензија со 5 ѕвезди.“

„Најголемото изненадување за мене беше колку прекрасни беа гостите. Луѓето беа искрени, љубезни и полни со разбирање. А на економски план, бев изненадена од приходот. Не очекував да се снајдам толку добро, а камоли да го претворам во кариера. Се фокусирав на работите што навистина ми се допаѓаат во угостувањето, ја искористив секоја можност што ја имав и на крајот испадна многу добро.“