Изработка на деловен план за угостување

Ник и Сара Русос-Каракајан се сопруг и сопруга од тимот Супердомаќини (@nestrs) кои угостувањето го претворија во бизнис со полно работно време во Колумбус, Охајо. Откако го огласија својот подрум во Њујорк на Airbnb во 2012 година, тие станаа зависни. Оттогаш, тоа е нивната работа од соништата. Сара е исто така кодомаќин на подкастот „Ви благодариме за посетата”, извор за искусни и новопечени домаќини. Тука, тие споделуваат знаења и совети за започнување бизнис на Airbnb.

Сара: „За нас, сѐ започна во Квинс, Њујорк. Бев актерка. Исто така, многу работев и како шанкерка.“

Ник: „А јас бев практикант со магистерска диплома по архитектура кој едвај можеше да си купи јадење...”

Сара: „Обајцата многу сакавме да поседуваме имот, но не знаевме како. Еден ден, видов една минијатурна куќичка—беше најмалата во блокот и скапа за нас—но бев решена да најдам начин да ја добијам.“

Ник: „Со соодветно финансиско образование, заштеди и поддршка од семејството, успеавме да добиеме кредит.“

Сара: „И додека сето ова се случуваше, дознав дека мој пријател издава соба од својот стан на Airbnb, што му помагало да си ја плати киријата во Њујорк—тоа за мене беше неверојатно. Во тоа време малкумина знаеја за Airbnb. Му кажав на Ник дека и ние можеме да го огласиме имотот. Тој се двоумеше, но јас се заинтересирав. Се нафативме и тоа беше почеток на целата работа.”

Ник: „Се сеќавам како рибав тоалети и притоа бев среќен. Ја исплаќав хипотеката, па си мислев: „Да, ова е неверојатно! Како да направиме повеќе од ова?“

Сара: „Пренесов голем дел од моето угостителско искуство коешто го стекнав работејќи по луксузни хотели—и го обожавав. По четири години угостување и сопственост на домови во Њујорк, имавме среќа на врата да ни затропа инвеститор кој сакаше да го откупи местото од нас заедно со мебел и сè останато.“

Ник: „Откако добро размисливме, составивме долга листа на места што би можеле да ги посетиме и патувања низ земјата за да разговараме со мештаните, па се најдовме во Колумбус, Охајо.“

Сара: „Можноста за спојување на дизајнот, гостопримството и недвижностите—и притоа да ја имаме слободата за сопствен креативен избор—е остварување на сонот. Токму затоа сме сериозно посветени да ги научиме останатите да угостуваат.“

Сара: „Пред да започнете, ви препорачуваме да смислите изјава за мисијата. Ова ќе биде вашето основно начело и идеја-водилка, што е особено корисно во оние моменти кога можеби сте несигурни за насоката или одлуката. Вашата изјава за мисијата ќе ви помогне да се движите во вистинската насока. Исто така, ќе информира за начинот на кој го создавате и изработувате вашиот простор.“

Ник: „Кога создавате изјава за мисијата, одвојте време за да си поставите неколку прашања:

• Што ве мотивира?
• Кои се вашите вредности?
• Како сакате да работите?
• Која е вашата визија?
• Кои се вашите цели?“

Сара: „За нас, нашата мисија е да ги трансформираме просторите кои трансформираат животи. И се обидуваме да го запомниме тоа секогаш кога работиме.“

Ник: „Пред да се нафатите, важно е да направите истражување и да ја разгледате конкурентната средина во вашата област. Ова првично истражување ќе ви даде информација како да го дизајнирате, брендирате и пласирате вашиот простор.

• Размислете за вашата демографска состојба. Кој би резервирал сместување кај вас? На пример, кај нас, Колумбус е студентски град, па нашиот простор го оспособивме за родители кои доаѓаат во посета на своите деца.
• Проценете ги вашите удобности. Дали дозволувате миленичиња? Дали имате место за паркирање или базен? Дали вашиот простор е уникатно уреден? Сè она кое го крева вашето сместување на едно повисоко ниво отвора можност за повисока наплата.
• Пребарајте онлајн и разгледајте други Airbnb огласи, хотели и изнајмувања на краток период во близина. Што од нив е слободно? Колку наплаќаат? Постои ли начин да се издвоите од нив?
• Создајте стратегија на цени. За да ја зголемите стапката на пополнетост уште од самиот почеток, користете ја алатката „Паметно одредување цени“ на Airbnb, која ви овозможува автоматски да ги менувате цените помеѓу работните денови и викендите. “

Сара: „Создавањето буџет, иако можеби не е многу занимливо, сепак е од исклучителна важност. Ви препорачуваме да користите табела и да ги категоризирате трошоците во три категории:

Авансни трошоци: Ова се првичните инвестиции кои ги вложувате во вашиот простор пред некој да престојува во него, како што се реновирањето, уредувањето, мебелот и фотографирањето.

• Одвојте време да инвестирате во вашето уредување. Не мора да купувате од најскапите трговци на мало или да имате најлуксузни работи. Нека биде пријатно. Разгледајте што има во продавницата за половни предмети или бидете креативни, па сменете ја бојата или темата—таквите нешта ќе ги им го задржат вниманието на луѓето на вашето сместување.
• Секогаш им кажуваме на новите домаќини да инвестираат во удобни душеци, софи и чаршафи. Секој што ќе влезе во хотелска соба, најпрво скока врз креветот—погрижете се вашиот да биде удобен. Понекогаш добиваме рецензија со пет ѕвездички единствено благодарение на креветот, а тоа помага при раст на стапките на пополнетост.

Тековни трошоци: Основни предмети кои гостинот ги искористил, па ќе треба да бидат надополнети, како прибор за лична хигиена, тоалетна хартија, хартиени брисачи, батерии и светилки.

• Додавате ли извесни дополнителни работи како шишиња вода или кафе?
• Направете список на сите удобности што ви се потребни и погрижете се да бидете задоволни од цените што ќе ги најдете
• Купувајте на големо на секои шест месеци и следете ги количините на купените предмети во табела
• Кога зборуваме за предмети како што се чаршафи, земете предвид колку пати би сакале да ги купите во текот на годината. Погрижете се секогаш да имате убави и чисти чаршафи за гостинот.

Трошоци за одржување и управување: Ова покрива сè што е потребно за вашиот простор да биде безбеден, топол и погоден за живеење, вклучувајќи ги тревникот и надворешниот простор. Дали ќе ангажирате лице за чистење кое ќе ви помага околу примопредавање на сместувањето или кодомаќин?

Соберете ги овие цифри и осигурајте се дека сумата за инвестирање ви е прифатлива, а целите реални. Во спротивно, можеби ќе треба однапред да заштедите уште некој денар за да создадете простор со кој ќе се гордеете.“

Сара: „Ова ми е еден од омилените совети кои ги споделувам со домаќините: да угостат искрен и отворен пријател во сместувањето. Постојано сте во негова близина што може да сте ги подзаборавиле работите кои би му биле потребни на еден патник—како на пример, четка за заби или паста за заби—или пак можеби превидовте некој недостаток во дизајнот. Пријателот ќе ви даде повратен коментар за тие здодевни, но важни детали. Не сакате гостинот кој плаќа да ви ги посочи.“

Ник: „Сакаме да вклучиме „Заборавивте нешто?“ кошничка со прибор за лична хигиена и предмети кои на гостите би им затребале во последен момент. За да успеете, гостопримството мора да биде во основата на вашиот бизнис. Тоа е причината поради која луѓето повторно отседнуваат во хотелските ланци што ги сакаат. Таму знаат што може да очекуваат: простор во кој ќе се чувствуваат како првите луѓе што влегле, внимателно свиткани крпи и детали на кои можат да сметаат, како што е полнач за телефон до ноќната масичка. На гостите треба да им го понудите истото ниво на квалитет на услугата за да сакаат одново да се враќаат кај вас.“

Ник: „Угостувањето е предизвик, но сега играта е сосема поинаква отколку на почетокот кога се појави Airbnb. Има многу повеќе технологија, алатки, ресурси и поддршка кои помагаат во организирањето на процесот и кои ќе ви го олеснат животот како домаќин. “

Сара: „Кога домаќините започнуваат, препорачуваме да го спроведат целиот процес, од почеток до крај, за секој престој: од првичната порака за резервација, среќавањето на гостите, чистењето до примопредавањето. Откако ќе ги разберете деталите, тогаш може да го автоматизирате на многу различни начини, на пример:

• Веб-базирани апликации: Постојат апликации што може да ги користите (како што е IFTTT) за програмирање на активатори на настани и поврзување со дигитални алатки. На пример, кога ќе добиете потврда за резервација во електронската пошта, апликацијата може автоматски да ви испрати потсетник во календарот вам, на вашиот партнер или на лицето кое чисти.
• Паметните брави се вистинско револуционерно откритие. На гостите им се испраќа уникатен код кој е употреблив само за времетраењето на нивното патување. На тој начин гостите може сами да се пријавуваат, што значи дека не треба да го координираме времето за да ги пуштиме да влезат во станот. Можеме да стапиме во контакт со нив во текот на нивниот престој.
• Добрата старомодна листа: Составив тромесечна контролна листа за секој дом со работите што треба да ги направам во поглед на безбедноста и одржувањето, како што се проверка на филтрите на печката, батериите во противпожарните аларми и чистење под креветите. Ја отпечатувам листата и ја закачувам во еден страничен плакар—така секогаш кога ќе го посетам имотот сум во тек со статусот за таа година.“

Ник: „Создавањето бизнис на Airbnb бара напорна работа. Сепак, настојуваме да им покажеме на луѓето дека е возможно да поседуваат дом и да угостуваат со полно работно време, како и дека постојат повеќе начини тоа да се оствари.“

Сара: „Знаете, ми се случи промена на кариерата, и бев преплашена дека никогаш нема да најдам работа која ќе ја сакам колку настапувањето. Но, Airbnb ни го смени животот. Можеме сами да носиме креативни одлуки и немаме шеф над нас—со самото тоа, бизнисот е уште поспецијален.”

Ник: „Ни овозможува да останеме флексибилни и малку повеќе да уживаме во животот. Се надеваме дека ќе најдете начин да започнете бизнис на Airbnb и да го направите ваш. Ако ви треба уште некој совет, секогаш може да ни се обратите.“

Уживајте во угостувањето!
Ник и Сара, Нестрс