Како да ги подготвите сместувањето и гостите за шумски пожари

Сериозно ја сфаќаме безбедноста на домаќините и гостите. Нашата советодавна коалиција за доверба и безбедност соработуваше со Меѓународното здружение на началници на пожарникари (IAFC) за да ги сподели овие информации од нивната програма „Ready, Set, Go!“.

Иако програмата е со седиште во САД, нејзините совети се релевантни за многу места погодени од шумски пожари низ целиот свет. Еве неколку од предлозите на IAFC за намалување на ризиците и обука на гостите за безбедност при шумски пожари.

Ако планирате однапред, тоа може да ви помогне да се заштитите себеси, вашите гости и вашиот имот. IAFC предлага да ги преземете овие чекори:

• Отстранете ги обраснатите растенија во радиус од 9 метра (30 стапки) од вашата куќа, гаража и други објекти на имотот за да создадете простор што може да се заштити.
• На 1,5 метра (5 стапки) од основата на домот треба да има тврди површини како што се бетон, камен или бетонски плочки.
• Кога засадувате нешто во близина на домот, тоа нека бидат нискорастечки билни растенија кои можат да издржат високи температури.
• Отстранете ги ниските гранки за да создадете растојание од најмалку 2 метра (6 стапки) помеѓу тревите, грмушките и повисоките дрвја.

Регистрирајте се за итни известувања на локацијата на вашиот имот за да бидете информирани. Многу локални, регионални и национални владини агенции ја нудат оваа услуга. Проверете ги нивните веб-страници за детали.

Гостите кои патуваат од места што обично не се погодени од шумски пожари можеби не ги разбираат ризиците. Можете да им помогнете да бидат подготвени со овие совети од IAFC:

• Додајте основни информации за сезоната на шумски пожари во регионот и ограничувањата за палење во вашиот куќен ред.
• Оставете листа на локални контакти за итни случаи некаде на видно место во вашиот простор, како на пример на фрижидерот или на клуб масичката.
• Дајте им на гостите мапа од регионот на којашто јасно е прикажана адресата на вашиот имот, имињата на патиштата во близина, разни маршрути за евакуација и потенцијални безбедни локации. Вклучете го името на вашето соседство.
• Поттикнете ги гостите да се регистрираат за локалните известувања за итни случаи и да бидат во тек со тоа каде има активни пожари, дури и ако нема шумски пожар во близина на вашиот имот.
• Кажете им на гостите дека не мора да чекаат наредба за евакуација за да заминат. Можеби ќе им треба дополнително време да се снајдат во регионот ако не им е познат.

За повеќе информации во врска со подготовките за шумски пожари, контактирајте со локалната противпожарна служба. Ако сте во САД, може да ја разгледате и програмата „Ready, Set, Go!“ за да дознаете повеќе за шумските пожари и да направите план за дејствување.

Правилата за откажување што ќе ги изберете за вашиот оглас обично ги одредуваат повратните средства на гостите за откажаните резервации, освен ако вие и гостинот не се договорите поинаку. Ако некој голем настан на локацијата за резервација спречува или законски забранува некоја резервација да биде завршена, може да важи „Полисата за големи нарушувачки настани“ на Airbnb. 

Кога важи „Полисата за големи нарушувачки настани“, може да откажете резервација без надоместоци или негативни последици, а календарот на огласот ќе биде блокиран за тие датуми. Гостите со засегнати резервации, исто така, може да откажат и да добијат целосно враќање на парите. Ако вие или гостите откажете резервација што е покриена со полисата, нема да добиете исплата.