Додајте детали кои ќе им се допаднат на гостите

Кога гостите влегуваат во The Beach Lodge во Холивуд Бич, Калифорнија, веднаш добиваат претстава за тоа која е Тифани Калива-Таљедо. Нејзината промисленост и љубов кон дизајнот се чувствува преку декорот што го избрала – боите, текстурите и секој персонализиран детаљ. Како поранешна директорка на одделот за креативност, отсекогаш имала око за детали. Тука ги споделува своите тајни за успехот на Airbnb.

„Пред уредувањето, The Beach Lodge беше грда, гнила, зелена куќа. Луѓето ја нарекуваа „Дувло за наркомани“ и протрчуваа кога поминуваа покрај неа! Соседите мислеа дека сме луди што ја купивме, но јас видов нешто посебно во неа и верував дека ако ја реновираме, луѓето ќе почнат да доаѓаат. Вложив толку многу љубов во неа и мислам дека гостите се враќаат токму поради таа причина.“

Створете посебен амбиент
„Создавањето незаборавни искуства секогаш започнува со одредување соодветно расположение. Кога осмислувам некој простор, барам од клиентите да ми кажат какво чувство сакаат да постигнат, а не одредена тема. Што сакате гостите да почувствуваат кога ќе влезат во вашиот дом – удобност, радост, спокојство? За The Beach Lodge, наместо да одам со буквална тема за морското крајбрежје, размислував холистички за боите, текстурите и деталите, односно дезени кои се истакнуваат на воздушни неутрални површини, текстури кои потсетуваат на песок и многу растенија кои ќе ја внесат надворешноста во просторот.“

Уредувајте без големи трошоци
„Декорирањето не мора да биде скапо! Пазарите за стари предмети и продавниците за половни работи изобилуваат со богатства и уникатни парчиња кои имаат своја приказна, а не чинат многу. Само треба малку да пробуричкате. Посебно ме привлекуваат предмети кои го претставуваат моето филипинско и азиско потекло. Предметите што ќе ги изберете за вашиот простор треба да имаат свое значење, а заедно ќе ви помогнат да ја раскажете пошироката приказна за вашиот дом.“

Играјте си
„Уште еден совет што го споделувам со моите клиенти е дека некогаш треба и да си дозволат да поиграат. Сменете го декорот. Пробајте нешто ново. Освежувајте го просторот според годишното време. Така најдобро ќе дознаете што ви помага да го постигнете посакуваниот ефект, а што не. Гледајте го просторот како личност со своја сложеност и карактер. Како и вие, и сместувањето треба да се пренасочува, да се менува и да се развива за да ја достигне најдобрата верзија од себе во даден момент.“

Создајте мали оази
„Сакам да си играм со просторот и да додавам неочекувани визуелни ефекти. Мојот совет е да создадете мини оази низ сместувањето каде што гостите ќе можат да се задлабочат во некоја книга. Некогаш може да додадам ќебиња, перници и слика во ќошот, што би ги привлекло луѓето целосно да се опуштат. Размислете за тоа како можете да ги создадете овие мали катчиња за опуштање низ целото сместување.“

Додајте личен печат
„Кога е тоа можно, обезбедете им на гостите персонализиран престој со посебни детали. На пример, ако некој спомне дека слави роденден, ќе оставам колачи од моите омилени локални пекарници. Ако се вегани, ќе направам листа со локални ресторани. Ако се работи за семејство со деца, ќе ставам поиздржливи перници и постелнина. Овие внимателно осмислени детали навистина се истакнуваат кај гостите. Ќе видите дека влијаат на рецензиите кои ги добивате и на повторните резервации.“

За спомен, подарете им нешто што ќе го понесат дома
„Ви препорачувам на гостите да им подарите нешто за спомен кога ќе пристигнат. Овој едноставен гест ќе им даде чувство дека се посебни и добредојдени. Тоа може да биде подарок картичка за продавница или услуга во близина или разгледница од локален уметник“.

„За идејата дополнително да се продлабочи, гостите може да купуваат предмети директно од The Beach Lodge, вклучувајќи наметки и постелнина од еколошки материјали, како и ретро парчиња, или од онлајн продавницата што ја направив. Вклучив и брендови поседувани од жени, како и локални брендови кои ми се важни. Немам никаква финансиска корист од тоа. Сакам само да ги поврзам луѓето со овие брендови. За мене ова е многу повеќе од место за одмор.“

Замислете дека сте организатор на патувања
„Го крстивме нашиот дом The Beach Lodge (куќичка на плажа) бидејќи за нас тој претставува пријатен простор во кој луѓето можат да се дружат. Таму секогаш може да најдете друштвени игри, подлоги за јога, прибор за ракотворби, уметнички материјали, скара, крпи за плажа, велосипеди, интересни книги и грамофон. Целта на патувањето е да си го проширите видикот, а овие активности можат да им помогнат на луѓето да создадат спомени и нови начини на живеење. Размислете кои удобности можат да бидат од помош за подобрување на целокупното искуство.“

Запомнете дека сѐ е во деталите! Преку внимателно осмислените детали, гостите навистина ќе почувствуваат колкава грижа сте вложиле во просторот и ќе продолжат да се враќаат.

Дознајте повеќе за тоа како да станете домаќин