Водич на домаќинот за поддршка на одржливиот туризам

Дел од тоа да станете одржлив домаќин е и да ги поканите и гостите да се приклучат. Бидејќи одржливоста можеби е нова за нив, од помош би било да се објаснат начините на кои можат да го дадат својот придонес.

За да ве поддржиме во едукацијата на гостите за еколошки одржливите патувања, собравме совети од нашата глобална заедница на домаќини и соработувавме со „Програмата за животната средина на Обединетите нации“, авторитетен застапник за глобалната животна средина и „Светскиот фонд за диви животни“, водечката светска организација за зачувување и заштита на природата.

Прочитајте за да дознаете како може да промовирате еколошки одговорни патувања.

Бидејќи кратките патувања со автомобили се одговорни за три четвртини* од емисијата на гасови од транспортот, поттикнувањето на гостите да користат јавен превоз може да има значајно влијание.

Бидејќи снаоѓањето на нови места може да биде застрашувачко за патниците, помогнете им на гостите со тоа што ќе им дадете информации за автобусите, метрото или возовите во вашиот водич, вклучувајќи ги и приближните цени и најдобрите патишта до локалните знаменитости и аеродромот. Може да обезбедите велосипеди за гостите или да им препорачате место од каде што ќе можат да ги изнајмат.

Пластичните материјали создаваат многу отпад и често не се рециклираат. Бидејќи пластичните производи се штетни за планетата, важно е да избегнувате да ги купувате кога и да можете.

За да ги обесхрабри гостите да купуваат пластични предмети за време на нивниот престој, Супердомаќинот Тифани во Холивуд Бич, Калифорнија, обезбедува предмети за повеќекратна употреба за гостите како што се шолји и шишиња за вода. Во Чијанг Мај, Тајланд, Супердомаќинот Нут, исто така им кажува на гостите каде да ги наполнат шишињата со вода додека се излезени и истражуваат.

Исто така, чинии за повеќекратна употреба, прибор за јадење и кутии за складирање на храна можат да им овозможат на гостите да уживаат во оброците на отворено додека отпадот е сведен на минимум.

Користете го вашето упатство за користење на куќата или водич за да им кажете на гостите за вашиот омилен одржлив ресторан, зелениот пазар или продавницата за локални и одржливи производи. Ако има сезонски производи во вашиот регион, нагласете го и тоа. „Имаме многу предлози во нашиот водич за извонредни ресторани кои ја споделуваат нашата одржлива етика“, вели Супердомаќинот Ана од Пемброкшир, Велс.

Можете дури да ги истакнете и локалните производи што гостите можеби ќе сакаат да ги пробаат или да ги земат дома како сувенир. Во Тасманија, Австралија, Супердомаќинот Меридит остава домашен мед и рачно изработен сапун од лаванда кои можат да се искористат или да се понесат дома.

Во куќниот ред или упатството за користење на куќата, може да побарате од гостите да го сведат отпадот на минимум, да се тушираат пократко, да пијат филтрирана вода од чешма и да го задржат термостатот на моментално поставеното ниво. Исто така, може да оставите белешки низ вашето сместување за да ги потсетите гостите да ги исклучат светлата пред да заминат и да ја исклучат водата додека ги мијат забите.

Омар, Супердомаќинот во Мексико Сити прави видеа до кои гостите имаат пристап преку QR-кодови, кои го објаснуваат процесот на рециклирање во неговите станови и штетните ефекти на пластиката за еднократна употреба.

Овие практики не само што можат да ви заштедат пари, туку можат и да привлечат гости кои се обидуваат да патуваат на одржлив начин.

Заедниците низ целиот свет се погодени од еколошки проблеми како што се шумски пожари, поплави и екстремни временски услови. Со споменување на локалните проблеми во упатството за користење на куќата, може да ги подучите гостите за тоа како да бидат одговорни патници и да ги информирате за ризиците коишто можеби ги немаат дома, како загадување на воздухот или суша.

На пример, во регионите со лош квалитет на воздухот, најдобро е да избегнувате активности на отворено во денови со голема загаденост или да правите активности кои дополнително загадуваат, како што се возење, скара или палење огномет.

Со нагласување на чекорите што ги преземате во описот за сместувањето и упатството за користење на куќата, може да им кажете на потенцијалните гости дека се грижите за животната средина.

Ако им обезбедите на гостите работи како биоразградлив сапун за раце или шишиња за вода за повеќекратна употреба, не заборавајте да го истакнете тоа и во огласот.

Вклучувањето на овие идеи во вашата рутина на угостување може да има влијание врз планетата и да им овозможи на гостите да го доживеат животот како локален жител. Знаеме дека усвојувањето одржливи практики одзема време, па затоа собираме повеќе информации за да ви помогнеме.

СЛЕДНО: Дознајте како еден Супердомаќин станува поодржлив

*Од „60 акции за планетата“ на „Светскиот фонд за диви животни“, објавено на 5 март 2021 година

Информациите што ги содржи статијава може да се променети по објавувањето.