Одете напред за да пристапите до предложените резултати

    Подновете ги фотографиите на огласот

    Двајца професионални фотографи споделуваат пет начина за истакнување на вашиот оглас на Airbnb.
    Од Airbnb на 26 јул. 2022 г.
    Четиво од 7 мин.
    Ажурирано на 26 јул. 2022 г.

    Исклучителни одлики

    • Изберете насловна слика која го отсликува духот на вашиот простор

    • Расчистете го нередот, фотографирајте во висина на очите и внимателно избирајте ги кадрите

    • Во нашиот целосен водич може да дознаете како да го издигнете угостувањето на повисоко ниво

      Дали знаете дека фотографиите се еден од главните одлучувачки фактори кога гостите избираат сместување? Квалитетот на фотографиите може да влијае и на тоа колку често потенцијалните гости го наоѓаат вашиот оглас во резултатите од пребарувањето, што значи дека висококвалитетните фотографии се од суштинско значење за вашиот бизнис како домаќин.

      Џеф и Кандида се професионални фотографи и Супердомаќини кои ја користат својата креативност за да привлечат повеќе резервации во нивното пустинско живеалиште, Ел Ранчо, во Џошуа Три, Калифорнија. Нивната тајна е во тоа што просторот им изгледа исто толку убаво на фотографиите колку што изгледа во живо.

      Овде парот ги споделува своите стручни совети за подобрување на фотографиите од вашето сместување.

      1. Расчистете го нередот

      Средете го просторот пред да го фотографирате. „Понекогаш нѐ изненадува тоа колку луѓе забораваат да ги отстранат разноразните предмети од сместувањето пред да го фотографираат“, вели Џеф. „Се трудиме во нашиот простор за живеење да нема непотребен неред, па така и фотографирањето станува многу полесно бидејќи нема што да ни го одвлекува вниманието.“

      Сепак, тоа не значи дека просторот треба да биде целосно празен. „Додајте нешто човечко во кадарот“, вели Кандида, мислејќи на ќебе или неколку книги. „Тоа ќе го направи местото многу попријатно.“

      2. Ставете ја насловната слика во рамка

      Насловната слика на вашиот простор е првото нешто што патниците ќе го откријат во резултатите од пребарувањето и на страницата со огласот, па обидете се да ја направите впечатлива.

      „Размислете што го издвојува вашето место од другите. Што го прави посебно? Мислите ли дека луѓето ќе може да се видат себеси тука? Истражете други огласи на Airbnb за да се инспирирате и да дознаете што функционира“, препорачува Кандида.

      Не заборавајте да ги доловите и сите посебни простори што би можеле да бидат примамливи за потенцијалните гости, на пример, слика од широк агол од надворешниот простор на имотот.

      3. Најдете го вистинското светло

      „Тајната на одличните фотографии од сместувањата е светлото“, вели Кандида. Еве неколку предлози за да го доловите просторот во вистински сјај:

      • Набљудувајте го светлото. Експериментирајте и истражувајте како изгледа природната светлина во и надвор од вашиот дом во текот на денот.
      • Фотографирајте на самрак или во зори. Кога фотографирате на отворено, сликајте веднаш откако сонцето ќе зајде или пред да изгрее – во златното доба од денот. Тогаш светлото е помеко и не е директно, па имотот ќе изгледа пријатно и топло.
      • Нека изгледа природно. Ако ја фотографирате внатрешноста, направете го тоа во оној момент од денот кога таму има најмногу директна природна светлина. Вештачкото осветлување секогаш треба да биде последен избор, бидејќи изгледа пренагласено на фотографиите.
      • Исклучете го блицот. Како и со другото вештачко осветлување, користењето блиц може да доведе до пренагласеност. Ако во просторот што го фотографирате нема природна светлина, вклучете ламба за да создадете удобно чувство.

      4. Осмислете го кадарот

      Кога станува збор за квалитетот на фотографиите, ориентацијата, големината, поставеноста и симетријата на композицијата се исто толку важни колку и предметот на вашата фотографија. Еве неколку совети кои треба да ги имате предвид при осмислувањето на композицијата:

      • Центрирајте ги фотографиите. Не заборавајте дека Airbnb ги сече фотографиите за да се вклопат во огласот и во резултатите од пребарувањето. Поставете го главниот предмет во средина на рамката за да не се исече нешто важно. „Ако имате посебни предмети што ви се допаѓаат во домот, ставете ги во центарот на фотографијата за да се истакнат“, вели Џеф.
      • Фотографирајте во висина на очите. Ако фотографирате под неутрален агол, без изобличувања или пак одгоре или оддолу, на сликата ќе има добра рамнотежа, а гостите ќе го доживеат просторот поблиску до она што ќе го видат во живо.
      • Користете го правилото на третини. „Ако го поделите кадарот на третини, може да ги користите како насоки за подредување на елементите во композицијата“, вели Џеф.
      • Вклучете различни кадри. Фотографиите од широк агол се идеални за луѓето да разберат колкав е просторот, а со фотографиите со среден опсег најдобро се става акцент на одредени предмети, на пример, на телевизор или велосипед за вежбање. Малите додатоци што го збогатуваат духот на вашето место фотографирајте ги одблиску.
      • Создајте поврзаност. Гледајте на галеријата со слики како на обиколка со водич и покажете им на потенцијалните гости како собите се поврзани една со друга преку фотографиите.

      5. Претставете го својот простор во најдобро светло

      Размислувајте како гостин кога избирате што да фотографирате, а што да изоставите.

      „Важно е да споите и да изберете низа слики што најдобро ја раскажуваат вашата приказна“, вели Кандида. „Што ќе им се допадне на гостите во сместувањето? Дали има изненадувања за кои треба да знаат? Како да прикажете детали, но сепак да дадете севкупна претстава за тоа како изгледа собата?“

      Запомнете дека при раскажувањето на вашата приказна, треба да прикажете и поширок агол, односно да ја претставите и околината. „Не мора сите слики да бидат од домот“, забележува Џеф. Може да вклучите фотографии од планинарска патека во близина, на пример, или од слаткото кафуле во вашето маало.

      Пред сѐ, кога ги споделувате просторот и соседството, користете висококвалитетни фотографии за да им помогнете на потенцијалните гости да си го замислат престојот и да го резервираат вашето место за незаборавен престој.

      Информациите што ги содржи статијава може да се променети по објавувањето.


      Исклучителни одлики

      • Изберете насловна слика која го отсликува духот на вашиот простор

      • Расчистете го нередот, фотографирајте во висина на очите и внимателно избирајте ги кадрите

      • Во нашиот целосен водич може да дознаете како да го издигнете угостувањето на повисоко ниво

        Airbnb
        26 јул. 2022 г.
        Дали ова беше корисно?

        Можеби ќе ви се допадне и

        Можеби ќе ви се допадне и

        Разгледајте повеќе теми