Како да го направите просторот удобен за лица кои работат на далечина

Бидејќи работата од далечина станува почеста на многу места, забележавме големи промени во тоа како и зошто луѓето патуваат. Поради ова, сѐ повеќе гости се заинтересирани за простори кои им помагаат да си ја вршат работата насекаде.

Еве како да ги обезбедите вистинските удобности, да оспособите простор наменет за работа и да го промовирате вашето сместување.

Интернет врската е задолжителна за лицата кои работат на далечина и кои бараат брза и сигурна wifi мрежа која поддржува видеоповици и други работни задачи.

Може да ја потврдите брзината на wifi мрежата во вашето сместување без да ја напуштите Airbnb апликацијата така што ќе го користите тестот за брзина на wifi мрежата. Оваа алатка ви овозможува да ја тестирате брзината на wifi мрежата на имотот, а потоа да ја прикажете директно на страницата со огласот што ќе ви помогне да привлечете повеќе гости кои бараат брза интернет врска.

Ако во одредени делови од вашиот простор има слаб сигнал, засилувачите на wifi мрежата можат да помогнат со тоа. Исто така, може да биде корисно да дознаете како да го проверите рутерот од далечина за да го следите сигналот на wifi мрежата.

Направете тест за брзина на wifi мрежата

Просторите наменети за работа за гостите се клучна удобност, а создавањето еден таков простор е полесно отколку што мислите. За да ја додадете оваа удобност на вашиот оглас, ќе треба да понудите маса или биро што се користи само за работа, пристап до приклучник за електрична енергија и удобен стол.

Бидејќи на паровите кои работат од далечина можеби ќе им требаат посебни простори, размислете за тоа да оспособите два простора за работа. Може да ги известите гостите за овие карактеристики така што ќе изберете „Простор наменет за работа“ во делот „Удобности“ на вашиот оглас и ќе ги истакнете сите простори за работа во описот за сместувањето, фотографиите и насловите.

И домаќините чие сместување не е доволно големо за посебен простор за работа можат да ги примаат лицата кои работат на далечина. Кога гостинот треба да работи на далечина, „го заменувам едно од кујнските столчиња со канцелариско столче со тркалца“, вели Емилија, Супердомаќин во Ороно, Мејн. „Мислам дека самиот стол има големо значење.“

Освен просторот наменет за работа, гостите ги ценат и дополнителните детали кои можат да ја направат работата на далечина попријатна и попродуктивна.

Еве неколку опции што би можеле да ги земете предвид за вашиот простор:

• Неколку простори за работа. Дневната соба, трпезаријата или дворот може да понудат освежувачка промена на амбиентот и да им овозможат на повеќе луѓе да работат истовремено.
• Ергономска потпора. Подлогата за лаптоп, ергономскиот канцелариски стол и прилагодливиот потпирач за нозе можат да ви помогнат да ги направите долгите работни денови поудобни.
• Добро осветлување. Идеално би било да имате прозорци или стаклени врати кои обезбедуваат природна светлина, но и столната ламба може да помогне во осветлувањето на работниот простор.
• Апарат за кафе и чајник. Многу гости го сакаат кофеинот кој им помага да бидат попродуктивни. Можете дури и да обезбедите чај и кафе. Блогерката Елси, Супердомаќин во Нешвил, Тенеси, ви предлага да понудите повеќе опции за подготовка на кафе (на пример француска преса или автоматски апарат).
• Канцелариски материјал. Едноставните предмети како што се нови пенкала и тетратки се често корисни, додека пристапот до печатач може да ви помогне вашиот оглас да се истакне.
• Техничка поддршка. Работите како монитор за компјутер, паметни звучници и дополнителни полначи за телефони може да го подигнат квалитетот на вашиот работен простор.
• Заднина за видео конференции. Интересни тапети, растенија или уметност сместени зад просторот за работа може да им се допаднат на гостите кои често имаат видеоповици.
• Намалување на бучавата. Текстилот како завеси, килими, ќебиња и перници може да помогне во намалувањето на бучавата.

Откако ќе го направите вашиот простор удобен за работници на далечина, важно е да ги ажурирате описот за сместувањето, удобностите и фотографиите за гостите да знаат дека имате место погодно за работа.

• Искористете ги филтрите за пребарување. Кога прелистуваат огласи, многу гости применуваат филтри за да најдат простор со удобностите што ги сакаат, затоа погрижете се да го обележите полето „Простор наменет за работа“ и сѐ друго што нудите.
• Ажурирајте ги фотографиите и насловите. Бидејќи гостите може да ги проверат фотографиите од сместувањето пред да го прочитаат описот, погрижете се вашите слики да ги вклучуваат сите простори за работа што ги имате. Дознајте како да правите одлични фотографии.
• Дозволете им на гостите да се замислат себеси во вашиот простор. Во описот за сместувањето убаво објаснете како вашиот простор им одговара на гостите кои работат на далечина. Ако навистина сакате да се истакнете, може да ги вклучите тие информации во насловот на огласот.

Исто така, може да биде корисно да им испратите порака на гостите пред да пристигнат. Ако ги потсетите дека нудите работи како кафе или монитор за компјутер, така може да им помогнете подобро да си го испланираат патувањето.

Се надеваме дека овие совети ќе ви помогнат да создадете пријатен простор. Имајќи ги предвид потребите на гостите, ќе може да понудите удобен и продуктивен престој за лицата кои работат на далечина.