Направете одлични фотографии од просторот со својот телефон

Пред да започнете, одредете го најдоброто осветлување и организирајте го вашиот простор со помош на стратегии од нашиот прирачник за фотографирање. Одвојте време за да направите пет до шест фотографии од секоја соба.

Додека фотографирате, важно е да разберете како фотографиите од вашето сместување се прикажуваат на Airbnb:

• Првата слика е насловната фотографија – главната фотографија на страницата со огласот и онаа што се појавува во резултатите од пребарувањето.
• Првите пет фотографии, вклучувајќи ја и насловната фотографија, се прикажуваат како колаж на почетокот на страницата на огласот и се исечени како квадрат, затоа не заборавајте да ја центрирате фотографијата.
• Во галеријата со слики гостите можат да ги прелистаат сите ваши фотографии.

Одлични фотографии можат да се направат со многу телефони. Еве неколку корисни функции и како да ги користите.

Вклучете ја функцијата „Мрежа“
Мрежата може да ви помогне да ја поставите сликата во кадарот и да видите дали е исправена. За да ја прилагодите мрежата:

• За iPhone: одете на „Подесувања > Камера“ и притиснете го копчето за мрежата на вашиот телефон на „Вклучено“.
• За Android: отворете ја апликацијата за камерата, одете на „Подесувања“, движете се надолу и наместете ја опцијата за „Мрежни линии“ на „Вклучено“.

За повеќе совети околу користењето на мрежата, разгледајте го делот за правилото за третини подолу.

Исклучете го блицот
Користењето блиц може да создаде груб изглед, затоа јаката природна светлина е идеална. Ако вашиот простор има прозорци, обидете се да го фотографирате во најсветлиот период од денот. Ако во просторот нема прозорци, вклучувањето на светилките може да создаде пријатна атмосфера.

За да го исклучите блицот, отворете ја апликацијата „Камера“, пронајдете ја иконата со молња и изберете „Исклучи“.

Проверете ја резолуцијата на сликата
Најострите фотографии имаат резолуција од најмалку 1024 x 683 пиксела. Вашите подесувања можеби се оптимизирани само за складирање фотографии со ниска резолуција, затоа проверете дали зачувувате фотографии со висока резолуција за вашата фотосесија. Секогаш може да се вратите назад и да го смените ова откако ќе ги направите фотографиите.

Еве некои работи што треба и што не треба да се прават за добивање квалитетни слики.

Телефонот да биде исправен
ПРЕПОРАЧУВАМЕ: држете го телефонот исправено и паралелно со подот. За главното парче мебел да биде во средината, можеби ќе треба да ги кренете или спуштите рацете. Во спалните соби, фокусирајте се на креветот, а во дневните соби тоа нека биде, на пример, каучот на спуштање. Добро правило е камерата секогаш да биде доволно високо за да ги сними горните делови на креветите, масите и работните површини.

НЕ ПРЕПОРАЧУВАМЕ: не кревајте го телефонот над главата за да добиете подобар поглед и не држете го под агол бидејќи тоа често резултира со несакано искривување.

Следете го правилото на третини
Правилото на третини е принцип на фотокомпозиција којшто ја дели сликата на третини хоризонтално и вертикално, создавајќи девет квадрати и четири места каде што линиите се сечат. Со вклучување на функцијата „Мрежа“ на вашиот телефон и со користење на правилото за третини, можете да се осигурате дека фотографиите ќе бидат прави и ќе имаат добар состав.

ПРЕПОРАЧУВАМЕ: ставете го предметот кој е фокус на фотографијата онаму каде што се сечат линиите на мрежата (што е малку понастрана од средината). На пример, наместете го телефонот така што фокусот на кадарот – каучот, креветот или масата – е онаму каде што линиите се сечат лево или десно од вашиот екран.

НЕ ПРЕПОРАЧУВАМЕ: : не ставајте го средишниот фокус во долниот или горниот трет дел, во спротивно може да исечете важни информации.

Направете фокусирани фотографии

ПРЕПОРАЧУВАМЕ: користете ја функцијата за автоматски фокус за да не мора да го прилагодувате фокусот рачно.

Дознајте кога треба да зумирате
Поновите телефони често имаат однапред поставени режими за одредени средини, на пример, портрет, пејзаж и широк кадар. Ако камерата на вашиот телефон ги има овие опции, користете ги наместо физички да ја движите камерата.

Зумирањето на објективот е најуспешно кога фотографирате внимателно уредени делови од вашиот простор, како што е врамување на приказот за да се фокусирате само на дел од масичката за кафе, каучот и сликата што виси над него.

Ако телефонот не ги нуди тие режими, користете ги стандардните подесувања за да ја фотографирате собата како целина и зголемете само за да добиете слики одблизу, како што е цветниот аранжман на наткасната или каучот со уметнички дела што висат над него.

Покажете им на гостите зошто треба да се радуваат на престојот во вашето сместување. Иако описот за сместувањето дава важни детали, една слика навистина вреди илјада зборови на Airbnb.

Истакнете ги удобностите
Гостите ги ценат информациите за посебните додатоци во вашиот простор, затоа не заборавајте да ги фотографирате значајните удобности. Подобро е да ги снимите во контекст на целиот простор, на пример слика од широк агол од здиплени крпи на клупа покрај када, наместо крупен кадар од елементите на кадата.

Еве неколку примери за удобности што може да ги фотографирате и да ги споменете во описите:

• Погодно место за работа со лаптоп.
• Предмети погодни за семејство, како што се детско столче за хранење или детско креветче.
• Надворешен простор, како што се поплочениот двор, градината или балконот.
• Апарат за еспресо, ѓезве за кафе или сервис за чај.
• Премиум средства за лична хигиена, како што се плишани крпи за во бањата, бањарки или влечки.

Насочете ја камерата
Користете хоризонтални слики за првите пет фотографии бидејќи тие најдобро се прикажуваат во мрежата на страницата со огласот.

ПРЕПОРАЧУВАМЕ: користете вертикални слики за тесни простори, како што се гардеробери во кои може да се влезе, мали бањи или балкони.

НЕ ПРЕПОРАЧУВАМЕ: користење вертикална слика како една од петте фотографии во мрежата, бидејќи ќе биде исечена за да одговара на хоризонталниот дизајн.

Користете разни кадри
Може да им помогнете на гостите да се замислат себеси во вашиот простор така што ќе им покажете не само каде ќе спијат, јадат и ќе се опуштаат, туку ќе вклучите и фотографии од интересни детали.

Настојувајте да имате различни кадри за секоја соба, различни фотографии со широк, среден и крупен кадар, од кои некои се хоризонтални, а некои вертикални. Еве кога да го користите секој вид на кадар:

• Фотографиите од широк агол служат за да го претстават просторот, а им помагаат на луѓето да ја разберат големината на собата и сѐ што таа нуди.
• Сликите со среден кадар функционираат добро од директна перспектива, а не под агол. Оваа слика им помага на гостите да добијат претстава за главната карактеристика на собата.
• Фотографиите со близок кадар помагаат да се прикаже атмосферата во собата, како што се книгите на наткасната. Кога правите снимки со близок кадар, обрнете дополнително внимание на она што е во кадарот. Не заборавајте да ги наместите перниците, да ги скриете каблите и да ги измазните чаршафите.

ПРЕПОРАЧУВАМЕ: покажете како собите се поврзани една со друга преку вашите фотографии. На пример, прикажете ја дневната соба во позадина на слика со близок кадар. Гледајте на галеријата со слики како на обиколка со водич за да им дадете претстава на гостите за распоредот на собите.

Направите повеќе фотографии отколку што ќе ви бидат потребни
Вложивте многу труд за да го подготвите просторот, затоа не заборавајте да фотографирате сѐ. Подоцна може да одлучите кои ќе ги споделите.

При изборот, имајте предвид дека фотографиите треба да ја раскажат приказната за вашиот простор и да им покажат на гостите што да очекуваат. Еве неколку предлози:

• Поставете доволно фотографии за гостите да знаат што точно да очекуваат.
• Вклучете две до четири фотографии од секоја соба до којашто гостите имаат пристап.
• Фотографирајте од различни агли на секоја соба за да ја добиете целосната слика.
• Фотографирајте одблиску за да го прикажете амбиентот на вашето место.
• Јасно снимете ги сите карактеристики за пристапност за лица со попреченост.

Користете ја оваа листа на барања
За да ви помогнеме да започнете со фотографирањето, создадовме листа на препорачани фотографии и агли.

Спални соби

• Фотографија од широк агол од секоја спална соба.
• Различен агол на собите за повеќе контекст.
• Фотографија со среден кадар од главни елементи, како што се креветот и наткасната.
• Фотографија одблизу која ја прикажува атмосферата, како книга или цвеќиња на наткасната.

Дневна соба

• Фотографија со широк кадар од целиот дневен простор (со светлина од прозорец ако е можно).
• Фотографија со среден кадар од каучот или просторот за седење.
• Фотографија одблизу која го истакнува амбиентот, како камин.

Бања

• Фотографија со широк кадар од главната бања.
• Фотографија со среден кадар од втората бања, со кадата или тушот и мијалникот.
• Фотографија одблизу од наредени крпи или поглед низ прозорец.

Кујна

• Фотографија со широк кадар од целата кујна или кујничка.
• Фотографија со среден кадар од рерната, веднаш до уредно организираните работни површини.
• Фотографија одблизу на цветен аранжман во средина на масата.
• Фотографија одблизу од кошница за добредојде со средства за чистење за гостите.

Надворешен простор

• Фотографија со широк кадар од балконот, градината, поплочениот двор или тремот.
• Фотографија со среден кадар од сите места за седење надвор (и по можност видикот од нив).
• Фотографија со крупен кадар од секој внимателно дизајниран предмет, како што се растенијата во саксии и мебелот во дворот.
• Фотографија со широк кадар од патеката до влезот.

Вие најдобро го познавате својот простор, затоа не заборавајте да ги фотографирате сите омилени детали и сѐ она што гостите го истакнуваат во своите рецензии. А пред да ја завршите фотосесијата, одвојте неколку минути за да ги прегледате сите фотографии што сте ги направиле за да се уверите дека сте опфатиле сѐ што е на вашата листа.

Истражете го прирачникот за фотографирање:

• Дел 1: подгответе го просторот за фотосесија со паметен телефон.
• Дел 2: направете квалитетни фотографии со паметниот телефон.
• Дел 3: изберете и уредете фотографии за огласот.