Како да ги подготвите сместувањето и гостите за шумски пожари

Сезоните со рекорден број шумски пожари влијаат на животите на домаќините и гостите ширум светот. Поважно од кога било е да имате планови во случај на шумски пожар за да се заштитите себеси, своите гости и имотот.

Во Airbnb, многу сериозно ја сфаќаме вашата безбедност и безбедноста на вашите гости. Како дел од нашата неодамна започната Советодавна коалиција за доверба и безбедност, соработуваме со Меѓународната асоцијација на началниците на противпожарните служби (IAFC) за да споделуваме информации за безбедноста во случај на шумски пожари за да можете да го заштитите својот имот и да им дадете важни информации на гостите што може да им бидат од корист во итен случај.

Секогаш можете да планирате однапред во случај на шумски пожар во вашата заедница. Програмата на IAFC „Ready, Set, Go!“ е одличен извор на совети за безбедност во случај на шумски пожари. Иако програмата е заснована на ситуации во САД, советите може да важат за сите низ целиот свет.

Еве неколку од предлозите на IAFC:

• Отстранете ги обраснатите растенија во радиус од девет метра (30 стапки) од вашата куќа, гаража и други објекти на имотот за да создадете простор што може да се заштити.
• На 1,5 метра (5 стапки) од основата на куќата треба да има тврди површини како што се бетон, камен или бетонски плочки.
• Кога засадувате нешто во близина на куќата, тоа нека бидат нискорастечки билни растенија кои можат да издржат високи температури.
• Отстранете ги ниските гранки за да создадете растојание од најмалку 2 метра (6 стапки) помеѓу тревите, грмушките и повисоките дрвја.

За да останете информирани додека угостувате, може да се регистрирате за известувања за итни случаи во регионот каде што се наоѓа вашиот имот. Повеќето се достапни на веб-страницата на вашиот град или држава. Така може да добиете информации за тоа што се случува дури и ако не сте во близина додека имате гости.

Некои гости можеби патуваат од области кои не се погодени од шумски пожари и можеби не ги разбираат ризиците. Како и да е, може да им помогнете на гостите да бидат подготвени.

Пробајте ги овие совети од програмата „Ready, Set, Go!“:

• Во куќниот ред, додајте основни информации за последиците од шумските пожари во вашиот регион за гостите да бидат свесни пред да резервираат дека може да дојде до шумски пожари.
• Оставете листа на локални контакти за итни случаи некаде на видно место, како на пример на фрижидер или клуб масичка.
• Наведете го вообичаеното име на населбата или регионот (на пример, заедницата „Мулвуд“ во Калабасас, Калифорнија). Ова може да го додадете во куќниот ред, а и да го вклучите во листата со информации за итни случаи.
• Дајте им на гостите мапа од регионот на којашто јасно е прикажана адресата на вашиот имот, имињата на патиштата во близина, разни маршрути за евакуација и потенцијални безбедни локации каде што гостите ќе можат да се скријат.
• Поттикнете ги гостите да се регистрираат за локалните известувања за итни случаи и да бидат во тек со тоа каде има активни пожари, дури и ако нема шумски пожар во близина на вашиот имот.
• Кажете им на гостите дека не мора да чекаат наредба за евакуација за да заминат, особено бидејќи можеби ќе им треба дополнително време да се снајдат ако регионот не им е познат.

За повеќе информации во врска со подготовките за шумски пожари, контактирајте со локалната противпожарна служба. Ако сте во САД, може да ја разгледате и програмата „Ready, Set, Go!“ за да дознаете повеќе за шумските пожари и да направите план за дејствување.