Совети за чистење од искусни домаќини

Чистото место може да доведе до одлични рецензии. Според податоците на Airbnb, недостатокот на чистота е една од главните причини за негативна рецензија. Пробајте ги овие совети од искусни домаќини за да го одржите вашето место блескаво чисто.

Без разлика дали чистите сами или ангажирате лица за чистење, од суштинско значење е вашиот простор да биде темелно исчистен помеѓу секој гостин, секојпат.

„Важно е да бидете доследни и да имате листи на барања за лицата што чистат“, вели Џулиет, член на Советодавниот одбор на домаќини во Најроби, Кенија. „Тоа им помага бидејќи им станува рутина. Правилното чистење навистина функционира.“

Ако ангажирате лице за чистење, сами поминете низ процесот на чистење за да знаете точно што треба да се направи и што треба да се вклучи во листите на барања. Погрижете се да оставите доволно време помеѓу резервациите за да може да се изврши темелно чистење, како и да најдете второ лице за чистење или да создадете резервен план во случај лицето за чистење еден ден да не може да дојде.

Чистењето за гостите бара многу повеќе внимание на деталите отколку кога чистите за себе. Размислете да инвестирате во периодично подлабинско чистење за да ги направите рутинските задачи помеѓу резервациите помалку интензивни и поефикасни.

Џулиет ја нагласува важноста да се фокусирате на одредени делови додека чистите.

• Почнете од просториите кои се користат почесто. „Кујната и бањите се навистина важни, бидејќи тие се најкористените простори“, вели Џулиет. Откако бањите ќе бидат беспрекорни, ѝ доаѓа редот на кујната, каде што лицата за чистење ги мијат сите садови. „Навистина темелно чистиме“, вели таа.
• Следно: спалните соби. Лицата кои чистат кај Џулиет ги отвораат фиоките, проверуваат под креветите и гледаат ништо да не се пропушти. „Потоа ја тргаме постелнината од секој кревет, ја проветруваме куќата, целосно ги отвораме прозорците, ја киснеме постелнината“, вели таа.
• Накрај се фокусираат на креветите. Каква е рутината на Џулиет? „И душеците и перниците имаат заштитници, па се менува сѐ“, вели таа.

Размислувајте како гостин. На пример, Тами, домаќин во Сиетл, вели: „Честопати ја забораваме завесата за туширање. Имам пластична завеса и по секој гостин ја прскам со спреј и ја пребришувам. Исто така, ја заменувам на еден или два месеца.“

Не пропуштајте ги и деловите што често се допираат, како прекинувачите за светло. „Тие може да станат многу нечисти, но вие не ги забележувате бидејќи сте навикнати на нив“, вели домаќинот Адам од Атланта. „Малку алкохол за чистење би требало да ја заврши работата.“

Гостите никогаш не сакаат да најдат туѓи влакна во сместувањето каде што престојуваат. Сју и Џон, домаќини во Солт Лејк Сити, имаат совет за справување со влакната: „Откако ќе ја исперам целата постелнина, ги поминувам чаршафите, навлаките за перници и ќебињата со валјак за собирање влакна“, велат тие.

Лора, домаќин во Котонвуд, Аризона, предлага замена за чистењето со џогер. „Рачно исчистете го подот во бањата“, вели таа, користејќи четка или крпа од микрофибер. „Така е побрзо и полесно и нема да пропуштите ниедно влакно.“ И не заборавајте да ги исчистите одводите од бањата помеѓу секој гостин.

Еве малку инспирација за чистење од искусни домаќини:

• Прво наполнете ја машината за перење. „Првото ги земам сите постелнини и крпи и ги фрлам во машината за перење, а таа си работи додека го чистам остатокот од сместувањето“, вели Ема-Кејт во Сан Франциско. „Така сум поефикасна.“
• Исполирајте ги дрвените подови. „Имам дрвен под. Редовно ги полирам за гостите да видат блескав под кога ќе влезат“, вели Тами во Сиетл. „Тоа дава една севкупна перцепција за чистота која ги смирува гостите.“
• Подвиткајте ја тоалетната хартија во бањата. „Јас го подвиткувам долниот дел од тоалетната хартија“, вели Ема-Кејт. „Знам дека е ситница, но дава чувство на чистота и покажува дека се грижите.“
• Наполнете ги шишенцата за сапун за раце и шампон. „Убаво е да има удобности во бањата кои не изгледаат како да се користени“, вели Алекс во Сан Франциско. „Ако шишенцето е полно и затворено, тоа прави гостинот да се чувствува како да е првата личност што го употребува“.