Како да го примените во пракса процесот за чистење во пет чекора на Airbnb

Бидејќи чистотата е поважна од кога и да е, домаќините на сместувања треба да се обврзат на процесот за потемелно чистење во пет чекора на Airbnb, а ние сме тука да ви помогнеме да го примените процесот во пракса. Оваа статија ќе ви ги објасни петте чекора, а ќе ви даде и дополнителни упатства, совети и најдобри практики за да спроведете доследен стандард за чистење. Овие најдобри практики се засноваат на прирачникот за потемелно чистење, којшто е создаден со помош на експерти за здравје и угостителство, земајќи ја предвид вашата благосостојба.

За да ви помогнеме да започнете, споделуваме најдобри практики за 5-те чекора од процесот на чистење: подгответе, исчистете, дезинфицирајте, проверете и одново поставете.

• Проветрувајте ги собите пред и за време на чистењето. Регулаторните органи, како што се Светската здравствена организација (СЗО) и Центрите за контрола и превенција на болести на САД (ЦКБ), препорачуваат да се отворат надворешните врати и прозорците и да се користат вентилатори за да се зголеми струењето на воздухот во просторот пред да започнете со чистење и дезинфекција. Проветрувајте го просторот колку што е можно подолго пред и за време на чистењето.

• Снабдете ги вистинските средства за чистење. Ви препорачуваме да користите само раствори за дезинфекција и антимикробно чистење коишто се регистрирани од соодветната владина агенција (на пр., Европската агенција за хемиски средства или Американската агенција за заштита на животната средина).

• Прегледајте ги упатствата за безбедност за хемиските средства. Секогаш читајте ги етикетите на производите за да дознаете кои се нивните активни состојки и како правилно да ги користите.

• Измијте ги рацете најмалку 20 секунди со сапун и вода. Ако тоа не е возможно, користете средство за дезинфекција на рацете што содржи најмалку 60% алкохол и следете ги најновите упатства на локалните власти.

• Носете заштитна опрема. Пред да влезете во просторот, размислете да ставите заштитна опрема, како ракавици за еднократна употреба и маски или прекривки за лице.

• Исфрлете го ѓубрето. Почнете со овој чекор за да спречите ѓубрето да го контаминира просторот откако ќе го исчистите. Не заборавајте да ставите нови кеси во сите корпи за отпадоци за полесно фрлање на марамчињата и другиот отпад.

• Соберете ги сите валкани постелнини од просторот. Домаќините нѐ известија дека перењето е една од активностите што одзема најмногу време при смена на гостите. Соберете ја валканата постелнина веднаш штом ќе влезете во просторот и не тресете ја за да избегнете распространување на микробите.

• Исклучете ги апаратите пред чистење. За ваша безбедност и за да ја заштитите покуќнината, не заборавајте да ги исклучите апаратите пред чистење. Апаратите чијшто прекинувач е наместен на „исклучено“ се поврзани со струјата сѐ додека не се исклучат од штекерот. Може да го исклучите и напојувањето од прекинувачот на струјното коло.

Потсетник за безбедност: размислете за носење чиста заштитна опрема пред да влезете во некој простор. Ако ги следите сите безбедносни етикети може подобро да разберете како правилно да ги користите хемиските средства за чистење.

Чистење подразбира отстранување микроби и нечистотии од површините – на пример, користење на крпа со средство за да избришете работна површина во кујната или шпоретот. Важно е да го завршите овој чекор пред да го дезинфицирате просторот.

• Перете ја постелнината на највисоката температура препорачана од производителот. Не заборавајте да ги измиете рацете пред да ја допрете чистата постелнина.

• Измијте ги сите садови и испразнете ја машината за садови. Важно е да ги измиете садовите што ги искористиле гостите за да бидете сигурни дека ги исполнувате хигиенските стандарди. Ако немате машина за миење садови, измијте ги садовите со топла вода и антибактериско средство за миење садови. За да избегнете вкрстена контаминација, прво прошетајте низ местото и соберете ги садовите од сите простории.

• Избришете прашина и исчистете го подот со правосмукалка. Кога бришете прашина, почнете одгоре-надолу за да не останат видливи траги. Изметете ги сите цврсти подни површини и исчистете ги теписите со правосмукалка.

• Исчистете ги тврдите површини со сапун и вода. Избришете ги сите површини за да се отстранат нечистотиите, маснотиите, прашината и микробите. Во тврди површини спаѓаат работните површини во кујната, масите, мијалниците, шкафовите и подовите. Кога бришете со џогер, започнете од задниот дел на собата и движете се кон предниот, а потоа истурете ја водата во мијалник кој сѐ уште не е исчистен.

• Исчистете ги меките површини според упатствата на производителот. Во меки површини спаѓаат теписите, постелнините и тапацираниот мебел. Ако се валкани, внимателно отстранете ги видливите нечистотии и маснотии, а потоа исчистете со соодветните средства за чистење. Ако е можно, исперете ги предметите во машина за перење алишта согласно упатствата на производителот.

Потсетник за безбедност: за да спречите ширење на микробите, не допирајте го лицето додека чистите.

Дезинфекција е кога користите хемиски средства за намалување на бројот на микроби и бактерии. Во овој чекор бараме од домаќините да ги дезинфицираат сите површини коишто најчесто се допираат. На пример, домаќините може да ги дезинфицираат бравите на вратите, прекинувачите за светло и шкафовите така што ќе ги испрскаат овие површини со хемиско средство за дезинфекција.

• Откако ќе исчистите некоја тврда површина, испрскајте ја со средство за дезинфекција. Посветете внимание на дезинфицирањето на сите површини што често се допираат во просторот (како што се рачките на вратите и прекинувачите за светло). Погрижете се да ги дезинфицирате електронските уреди според упатствата за чистење на производителот.

• Средството за дезинфекција нека остане влажно одредено време. На етикетата на производот е наведено колку време треба да стои хемиското средство на површината за да се изврши ефикасно антимикробно чистење. Така, хемиското средство ќе има доволно време да уништи што е можно повеќе микроби.

• Оставете ги површините да се исушат. Ако површината се исуши пред времето што е наведено како доволно, нема гаранција дека производот ги убил патогените микроорганизми како што се тврди на етикетата.

Потсетник за безбедност: Читајте ги сите безбедносни етикети за да бидете сигурни дека соодветно ги користите хемиските средства за чистење.

Ќе имате пристап до приспособени листи на барања за чистење според деталите за сместувањето. Разгледајте ги најдобрите практики во листите на барања за секоја соба одделно и споделете ги со тимот за угостување или со професионалците за чистење.

• Уште еднаш проверете дали е извршено антимикробно чистење на сите површини што најчесто се допираат. Забележете сè што можеби сте пропуштиле.

• Проверете дали има некакви проблеми со одржувањето или нешто недостасува. Додека проверувате, забележете ги сите работи што треба да се заменат, дополнат или снабдат.

За да спречите вкрстена контаминација, важно е да завршите со чистење и дезинфекција на собата пред одново да ја наместите за следниот гостин.

• Фрлете ги и измијте ги материјалите за чистење. Фрлете ги производите за еднократна употреба, како што се марамчињата за дезинфекција. Не заборавајте да ги исчистите и сите други алатки што сте ги користеле. Исперете ги сите крпи за чистење на највисоката можна температура што е соодветна за материјалот.

• Безбедно отстранете ја опремата за чистење откако ќе завршите со чистењето. Фрлете ја или измијте ја заштитната опрема во согласност со упатствата за употреба.

• Мијте ги рацете најмалку 20 секунди со сапун и вода. Ако тоа не е возможно, користете средство за дезинфекција на раце што содржи најмалку 60% алкохол и следете ги најновите упатства на локалните власти.

• Визуелно прегледајте ја секоја соба за да се уверите дека е поставена за следниот гостин. Замислете се себеси како гостин кој за првпат влегува во просторот.

• Оставете им материјали за чистење на вашите гости. Гостите ни кажаа дека сакаат да можат сами да чистат додека престојуваат во вашето сместување. Овозможете им го тоа така што ќе им оставите средства за чистење што ќе можат да ги користат, на пример средство за дезинфекција на раце, хартиени марамчиња за еднократна употреба, спреј или марамчиња за дезинфекција и доволно сапун за раце.

• Снабдете се со средства за чистење. Проверете ги роковите на употреба и дополнете ги сите средства што сте ги користеле за да бидете подготвени за следната смена на гости.

Потсетник за безбедност: секогаш чувајте ги хемиските производи подалеку од дофат на деца.

Сега, кога веќе го знаете процесот на чистење во 5 чекора, време е да ја ажурирате вашата моментална процедура и да ги примените овие техники во секоја соба во вашето место. Знаеме дека може да биде тешко да се прифати нова процедура за чистење, па затоа составивме сеопфатен прирачник за чистење којшто вклучува упатства, безбедносни совети и листи на барања поддржани од експерти, кои ќе ви помогнат да го примените процесот на потемелно чистење во 5 чекора на Airbnb. Бараме од домаќините на сместувања да го следат процесот за потемелно чистење во 5 чекора на Airbnb помеѓу секој престој.

Имајте предвид дека барањата за чистење може да се ажурираат со текот на времето како што се менуваат стручните совети. Процесот за потемелно чистење во 5 чекора на Airbnb и деталниот прирачник за чистење се засновани на научните сознанија кои постојано се подобруваат и имаат за цел да ги стават здравјето и добросостојбата на домаќините и гостите на прво место.

СЛЕДНО: Упатства за чистење за домаќини на приватни соби